کینٹربری( ویب ڈیسک ) ٹیسٹ میچز سے قبل نئے پاکستانی ہتھیاروں کی پہلی آزمائش آج ہوگی۔
آئرلینڈ اور انگلینڈ میں ٹیسٹ میچز کی تیاری کیلیے قبل از وقت انگلینڈ پہنچنے والے پاکستانی اسکواڈ نے مقامی کنڈیشنز سے ہم آہنگ ہونے کیلیے مسلسل 3روز تک پریکٹس سیشنز کیے ہیں،تیاریوں کی جانچ کا پہلا موقع کینٹ کیخلاف 4روزہ ٹور میچ ہوگا،ہفتے کو کینٹربری میں شروع ہونے والے مقابلے میں مہمان کرکٹرز فارم اور فٹنس کی آزمائش کریںگے۔دوسری جانب ٹیم مینجمنٹ کھلاڑیوں کی کارکردگی کا جائزہ لیتے ہوئے پلیئنگ الیون کے بارے میں ہوم ورک مکمل کریگی،پاکستانی اسکواڈ میں کپتان سرفراز احمد کو 4اوپنرز اظہر علی،سمیع اسلم، امام الحق اور فخرزمان کی خدمات میسر ہیں۔مڈل آرڈر میں اسد شفیق کا بیٹنگ نمبر4کے بجائے ٹاپ میں کرنے کاآپشن زیر غور ہے،بابر اعظم، حارث سہیل،سعد علی اور عثمان صلاح الدین بھی موجود ہیں۔ آل راو¿نڈر فہیم اشرف اور پیسرز محمد عامر،حسن علی،راحت علی،محمد عباس اور اسپنر شاداب خان میں سے بولنگ کمبی نیشن بنانا ہو گا۔کوچ مکی آرتھر کا کہنا ہے کہ وارم اپ مقابلے کو ٹیسٹ میچ سمجھ کر کھیلیں گے،طویل فارمیٹ کے مقابلوں کی تیاری کیلیے 4 روزہ میچ بہترین موقع فراہم کرتے ہیں،کینٹ کی ٹیم بہترین کھلاڑیوں پر مشتمل ہے۔ انہوں نے کہا کہ ہمیں اسی جذبے کیساتھ کھیلنا ہوگا جو انٹرنیشنل کرکٹ کیلیے درکار ہوتا ہے، پاکستانی ٹیم ٹیسٹ کرکٹ میں بھی عروج کی طرف گامزن ہونے کیلیے بے تاب ہے،انگلینڈ کا دورہ اس سفر میں ایک اہم سنگ میل کا درجہ رکھتا ہے۔ممکنہ ٹیم کے سوال کا جواب دینے سے گریز کرتے ہوئے مکی آرتھر نے کہا کہ نوجوان کرکٹرز کوآزماتے ہوئے انھیں ٹیسٹ ٹیم میں جگہ بنانے کا موقع دیں گے۔
