وزیراعظم عمران خان ملائیشیا پہنچ گئے ، والہانہ استقبال

کوالالمپور (مانیٹرنگ ڈیسک، صباح نیوز) وزیراعظم عمران خان ملائیشیا کے 2روزہ دورے پر کوالالمپور پہنچ گئے نجی ٹی وی کے مطابق ملائیشیا کے نائب وزیر خارجہ نے وزیراعظم عمران خان کا ایئرپورٹ پر استقبال کیا وزیراعظم اپنے دورہ میں ملائیشین ہم منصب مہاتیر محمد سے اہم ملاقات کرینگے۔ وزیر خارجہ شاہ محمود قریشی، وزیر خزانہ اسد عمر، وزیر اطلاعات چوہدری فواد حسین، مشیر تجارت عبدالرزاق داد وزیر اعظم کے ہمراہ ہیں۔وزیر اعظم عمران خان اور ملائیشیا کے ہم منصب مہاتیرمحمد کے درمیان آج بدھ کو اہم ملاقات میں علاقائی اور عالم اسلام کو درپیش چیلنجز پت تبادلہ خیال ہوگا۔ دوطرفہ تعاون پر بات چیت ہوگی،وزیراعظم ملائیشین ہم منصب مہاتیر محمد کی دعوت پر دورہ کر رہے ہیں،وزیراعظم کوملائیشیاکی ترقی کے ماڈل پربریفنگ دی جائےگی،اس کے علاوہ تعمیرات، روزگارکے مواقع بڑھانے پربھی بریفنگ دی جائےگی۔وزیراعظم حال ہی میں متحدہ عرب عمارات کے سرکاری دورے سے واپس آئے ہیں اور ماضی قریب میں بھی پاکستان کو معاشی بدحالی سے نکالنے کےلئے مختلف ممالک کے دورے کئے ہیں۔عمران خان چاہتے ہیں کہ ملک کو معاشی مشکلات سے نکالنے کےلئے دوست ممالک سے مدد لی جائے تاکہ آئی ایم ایف پر کم سے کم انحصار کیا جائے۔ اسی سلسلے میں سعودی عرب نے پاکستان کو تین ارب ڈالر نقد رقم اور ادھار تیل دینے کا وعدہ کیا ہے۔وزیراعظم چین کا دورہ بھی کر چکے ہیں جہاں دو طرفہ تعاون کے 15 معاہدوں اور مفاہمتی یاد داشتوں پر دستخط کیے گئے ہیں تاہم مالی امداد کی کوئی معلومات سرکاری ذرائع سے منظر عام پر نہیں آئی ہیں۔