کابل (مانیٹرنگ ڈیسک) افغانستان کے دارالحکومت کابل میں عید میلادالنبی کی تقریب کے دوران ہونے والے 2 خود کش حملوں سے اب تک کی اطلاعات کے مطابق 50 افراد جاں بحق جبکہ 85 سے زائد زخمی ہوگئے ہیں، زخمیوں میں کئی افراد کی حالت تشویش ناک ہے جس کی وجہ سے جاں بحق افراد کی تعداد میں اضافے کا خدشہ ظاہر کیا جا رہا ہے، داعش سمیت کسی نے بھی تاحال ذمہ داری قبول نہیں کی۔غیر ملکی میڈیا کے مطابق افغان دارالحکومت کابل کے ایک مقامی شادی ہال میں عید میلاد النبی کے حوالے تقریب جاری تھی کہ نامعلوم خود کش حملہ آوروں نے یکے بعد دیگرے 2 خود کش حملے کر دیئے، دھماکے اتنے شدید تھے کہ ان کی آواز میلوں دور تک سنی گئی، خود کش دھماکوں کے بعد ہر طرف قیامت صغریٰ کا منظر تھا، دھماکے کے فوری بعد سیکیورٹی اداروں نے شہر بھر کے حفاظتی انتظامات مزید سخت کر دیئے ہیں جبکہ امدادی اداروں نے فوری جائے حادثہ پر پہنچتے ہوئے زخمیوں اور جاں بحق افراد کی میتوں کو قریبی ہسپتالوں میں پہنچایا۔ افغان وزارت صحت کا کہنا ہے کہ زخمیوں کو طبی امداد کے لیے قریبی ہسپتال منتقل کر دیا گیا ہے جبکہ شہر بھر کی سیکورٹی سخت کردی گئی ہے۔ تقریب کی میزبانی کرنے والے ا±رانوس شادی ہال کے ایک منیجر نے بتایا کہ تقریب کے عین وسط میں خود کش بمبار نے خود کو دھماکے سے اڑا لیا۔ انہوں نے نام ظاہر نہ کرنے کی شرط پر بتایا کہ دھماکے میں بڑی تعداد میں ہلاکتیں ہوئیں اور خود میں نے 30 لاشیں گنی ہیں اور ایسا محسوس ہوا کہ تقریب میں شریک علما کو نشانہ بنایا گیا۔ آخری اطلاعات تک حملے کی ذمے داری کسی گروپ نے قبول نہیں کی تھی۔ واضح رہے کہ حال ہی میں کابل میں ہونے والے خود کش دھماکے کی ذمے داری داعش نے قبول کی تھی۔ ستمبر میں ریسلنگ کلب میں ہونے والے دھماکے میں 26 افراد کی ہلاکت کے بعد سے اب تک یہ افغانستان میں ہونے والا سب سے بدترین حملہ ہے۔
عید میلادالنبی تقریب میں 2 خودکش دھماکے ، 50 افراد جاں بحق ، 85 زخمی
