بھارت میں کشمیری طلباءکیخلاف ہندو انتہاپسندوں کی کاروائیاں

سرینگر (وائس آف ایشیا) مقبوضہ کشمیر میں والدین اپنے بچوں کوبھارت کے ان تعلیمی اداروں میں واپس بھیجنے پرتذبذب کا شکا رہیں جو مختلف بھارتی ریاستوں میں حملوں کے بعد واپس اپنے گھر آئے تھے ۔پلوامہ واقعے کے بعدکشمیریوںبالخصوص بھارت کی مختلف ریاستوں میں زیر تعلیم طلباءپر حملے اورہراساں کرکے تعلیمی ادارے چھوڑنے پر مجبور کیا گیا تھا۔ ان حملوں سے ہزاروں کشمیری طلباءکی تعلیم شدید متاثر ہوئی ہے اور وہ تعلیم ادھوری چھوڑکر واپس اپنے گھروں کو آگئے ہیں۔ سرینگر کے ایک رہائشی ہاشم اندرابی نے صحافیوں کو بتایا کہ ان کا بیٹا دہرادون کے دیو بھومی کالج میں ہندو انتہا پسندوں کے حملے میں بال بال بچ گئے جہاں وہ انجینئرنگ کی تعلیم حاصل کررہا تھا ۔ انہوں نے کہاکہ میں اب اس کو وہاں دوبارہ بھیجنے کا خطرہ مول نہیں لوں گا۔ شاہینہ پنڈت نے جن کی بیٹی اترا کھنڈ کے پی جی کالج میں زیر تعلیم تھی ، کہاکہ میر ا دل بیٹھا جارہا ہے جب میں یہ سوچتی ہوں کہ میر ی بیٹی کے ساتھ کیا ہوسکتا تھاکیونکہ وہ ایک ہجوم سے بڑی مشکل سے بچ نکلی ہیں۔ وہ اللہ تعالیٰ کی مہربانی سے گھر واپس پہنچ گئی ہے لیکن اب ہم اس کو وہاں بھیجنے کا خطرہ مول نہیں لے سکتے۔ مدثر حسن نے جو پلوامہ اور سرینگر میں ملینیم سکول آف ٹریننگ اینڈ ٹیکنالوجی کا ادارہ چلارہے ہیں،کہا کہ کشمیری طلباءشدید خوف اور دباﺅ میں ہیں اور بھارت میں ان کے ساتھ روا رکھے جانے والے سلوک کی وجہ سے طلباءکے وہاں جانے میں کمی ہوگی کیونکہ والدین اب اپنے بچوں کو بھارت کے تعلیمی اداروں میں بھیجنے سے ہچکچائیں گے۔