ویب ڈیسک : لبنان کے نومنتخب وزیراعظم مصطفیٰ ادیب کابینہ کی تشکیل میں تعطل کے باعث اپنے عہدے سے مستعفی ہوگئے ہیں۔
عالمی خبر رساں ادارےکے مطابق مصطفیٰ ادیب نے ہفتے کےروز صدرمشعل عون سے ملاقات کے بعد مستعفی ہونے کا اعلان کیا ہے۔
میڈیا رپورٹس کے مطابق لبنان کے وزیراعظم کا استعفیٰ فرانس کے صدر ایمینوئل میکخواں کے لیے انتہائی مایوس کن ثابت ہوگا جو لبنان کے سیاستدانوں پر کابینہ کی تشکیل کے حوالے سے زور ڈال رہے تھے۔
عرب نیوز کے مطابق سابق وزیر میجر جنرل اشرف رفی نے کہا کہ ’ادیب، جنہوں نے اسلحے اور کرپشن کی مافیا کے ساتھ ایک ماہ تک جنگ کی، وہ اپنا سر فخر سے بلند کر کے گئے ہیں اور انہوں نے حکومت کے نام پر کیے جانے والے تجربے کا حصہ بن کر لبنان کے شہریوں کو دھوکا نہیں دیا ہے۔‘
خیال رہے کہ مصطفیٰ ادیب کا استعفیٰ اس بات کے چند روز بعد سامنے آیا جب صدر مشعل عون نے رپورٹرز کے سامنے کہا تھا کہ اگر لبنان میں جلد حکومت نہ بنی تو ملک ’جہنم‘ میں چلا جائے گا۔
مصطفیٰ ادیب کو فرانس کے صدر ایمینوئل میکخواں کی بھر پور حمایت حاصل تھی جو وزیراعظم کا عہدہ سنبھالنے سے پہلے جرمنی میں سفیر تعینات تھے۔ مصطفیٰ ادیب نے یکم ستمبر کو وزیراعظم کا عہدہ سنبھالا تھا۔
واضح رہے کہ لبنان کے دارالحکومت بیروت میں 4 اگست کو ہونے والے دھماکوں کے بعد سے ملک میں سیاسی اور مالی بحران مزید شدت اختیار کر گیا ہے۔ دھماکوں میں تقریباً 200 افراد ہلاک اور متعدد زخمی ہوئے تھے، جبکہ تین لاکھ سے زیادہ بے گھر ہوگئے ہیں۔
