رواں سال نومبر میں ہونے والے امریکی صدارتی انتخاب کیلئے امریکا میں مقیم 71 فیصد مسلمانوں نے ڈونلڈ ٹرمپ کے دوبارہ صدر بننے کی مخالفت کردی۔
شکاگو میں موجود نمائندہ خصوصی سما یاسر فیروز کے مطابق امریکی صدارتی انتخاب کے تناظر میں مسلم ووٹ بینک پر سروے کیا گیا۔ جس میں مسلمانوں کی اکثریت نے ڈيموکريٹ صدارتی اميدوار جو بائيڈن کو ووٹ دينا کی خواہش کا اظہار کیا۔
یہ سروے کونسل آف امریکن اسلامک ریلیشنز کی جانب سے کیا گیا۔ اس سروے میں یہ انکشاف بھی کیا گیا ہے کہ اسلام مخالف بیانات کے باوجود ڈونلڈ ٹرمپ کی مسلمانوں ميں مقبوليت 17 سے بڑھ کر 19 فیصد ہوگئی۔
سروے میں مسلمانوں کا ووٹ جو بائیڈن کی جانب بڑھتا دکھایا گیا ہے۔ سروے کی مطابق اس بار سب سے زیادہ 89 فیصد مسلمان ووٹ دینے کا عزم رکھتے ہیں، جس میں سے 71 فیصد ووٹ ٹرمپ مخالف ہے۔
دوسری جانب ڈیموکریٹ پارٹی سے تعلق رکھنے والے پاکستانی امریکن نائب صدر کی امیدوار کو لے کر خوش نہیں۔ ان کا کہنا ہے کہ کاملا ہیرس کا جھکاؤ پاکستان سے زیادہ بھارت کی طرف ہوگا۔ ماضی کے سروے ظاہر کرتے ہیں کہ امریکی مسلمان ری پبلکن امیدواروں کے مقابلے میں ڈیموکریٹک امیدواروں کی حمایت کی طرف مائل رہے ہیں۔
امریکا کی مجموعی آبادی کو دیکھا جائے تو مسلمان امریکی اس کا محض ایک فی صد حصہ ہیں، تاہم یہ ایک فیصد تناسب بھی ووٹنگ میں اہم کردار ادا کرتا ہے۔ امریکا میں رہنے والے مسلمان یہ امید کرتے ہیں ٹرمپ ہوں یا جو بائیڈن، کسی ایک مخصوص قوم کو کسی بھی صورت نشانہ نہیں بنایا جائے گا۔
