بھارت کی ملیالم فلم انڈسٹری کے اداکار سدھارتھ وینوگوپال 2 سال کینسر سے جنگ لڑنے کے بعد انتقال کرگئے۔
بھارتی میڈیا رپورٹس کے مطابق سدھارتھ وینوگوپال کے انتقال کی تصدیق بھارتی اداکارہ سیما جی نیر نے بذریعہ سوشل میڈیا پوسٹ کی۔
شیئر کی گئی سوشل میڈیا پوسٹ میں اداکارہ نے سدھارتھ وینوگوپال کی موت کی خبر کی تصدیق کرتے ہوئے گہرے دکھ بھرے انداز میں لکھا کہ ’ تمام امیدیں دم توڑ گئیں، گزشتہ دو سالوں کے دوران میں آپ کیلئے لڑتی رہی حتیٰ کہ میرا دماغ اور جسم تھک چکا تھا، آج خدا نے فیصلہ کیا ہے کہ آپ کو اب مزید تکلیف نہیں اٹھانی چاہیے، میں یہ دکھ برداشت نہیں کرپاؤں گی‘۔
واضح رہے کہ سدھارتھ گوپال بھارت کی ملیالم انڈسٹری کا ایک جانا پہچانا نام تھے، بھارتی ریاست کیرالا کے ضلع تھریسور سے تعلق رکھنے والے سدھارتھ کو کالج لائف سے ہی اداکاری کا جنون تھا ، ان کے ابتدائی کیریئر میں بطور پریزنٹر کام بھی شامل ہے، بعد ازاں سدھارتھ ٹی وی سیریلز کا حصہ بن گئے۔
سدھارتھ وینوگوپال کے لواحقین میں والدہ اور چھوٹا بھائی شامل ہیں، جب کہ ان کے والد کا چند سال قبل انتقال ہو گیا تھا۔
