کراچی (نیوزایجنسیاں)نیپال کرکٹ ٹیم کے ابھرتے ہوئے سپنرسندیپ لیمی چین بگ بیش لیگ میں بڑے بڑے بازوں کے چھکے چھڑانے کے بعد پاکستان سپر لیگ (پی ایس ایل)میں بھی دھاک بٹھانے میں کافی حد تک کامیاب ہوئے ہیں جن کا کہنا ہے کہ وہ دوبارہ پاکستان آنے کا بھی بے صبری سے انتظار کریں گے۔18 سالہ لامی چانے نے پی ایس ایل کے رواں سیزن میں لاہور قلندرز کی نمائندگی کی اور 7 میچوں میں 11 وکٹیں حاصل کرنے میں کامیاب ہوئے۔ انہوں نے اپنے دورہ پاکستان کو یادگار قرار دیتے ہوئے کہا ہے کہ کراچی میں آنا بہت ہی زبردست رہا۔ میں نے اپنے دورے کا خوب لطف اٹھایا اور دوبارہ آنے کیلئے بھی بے صبری سے انتظار کروں گا، چاہے پی ایس ایل کھیلنے آﺅں، یا نیپال کی کرکٹ ٹیم کے ساتھ آنے کا موقع مل جائے۔لامی چانے کا کہنا تھا کہ میں نیپال کرکٹ ٹیم کیساتھ پاکستان آنے کیلئے بیتاب ہوں کیونکہ مجھے یقین ہے کہ اب پاکستان میں مزید کرکٹ ہو گی ۔ پاکستان کے شائقین کرکٹ کے بارے میں انتہائی پرجوش ہیں اور مزید بین الاقوامی کرکٹ کے حق دار ہیں۔ ہم سب گھر جیسا ہی محسوس کر رہے تھے اور کسی بھی طرح کا کوئی مسئلہ نہیں تھا اور پاکستان کیلئے یہ بہت ہی شاندار خبر ہے کہ پی ایس ایل کے میچ پاکستان میں ہو رہے ہیں جس میں غیر ملکی کھلاڑی بھی شریک ہیں۔
سندیپ نے دورہ پاکستان کو یادگارقراردیدیا
