دفاع کا حق آئندہ بھی استعمال کرینگے : عمران خان

اسلام آباد (مانیٹرنگ ڈیسک) وزیراعظم عمران خان نے کہا ہے کہ قوم کو مسلح افواج کی صلاحیتوں پر پورا بھروسہ ہے، ہم اپنے دفاع کا حق آئندہ بھی استعمال کریں گے۔ ان خیالات کا اظہار انہوں نے ملاقات کیلئے آنے والے مسلح افواج کے سربراہان سے گفتگو کرتے ہوئے کیا، وزیراعظم عمران خان سے تینوں مسلح افواج کے سربراہان نے ملاقات کی، ملاقات وزیراعظم آفس میں ہوئی۔ اس موقع پر چیئرمین جوائنٹ چیفس آف سٹاف کمیٹی جنرل زبیر محمود حیات، آرمی چیف جنرل قمر جاوید باجوہ، نیول چیف ظفر محمود عباسی اور ایئر چیف مجاہد انور خان بھی موجود تھے۔ ملاقات میں ملکی سلامتی کی صورتحال پر غور اور پاک فوج کے پیشہ ورانہ امور پر تبادلہ خیال کیا گیا اور خطے کی سکیورٹی اور23 مارچ کے حوالے سے قومی تقریب کی تیاریوں کا جائزہ بھی لیا گیا۔ مسلح افواج کے سربراہان نے اس عزم کا اظہار کیا کہ مسلح افواج کسی بھی جارحیت سے نمٹنے کے لئے تیار ہیں، سروسز چیفس نے زمینی، فضائی اور بحری صورت حال اور تیاریوں پر وزیر اعظم عمران خان کو بریفنگ دی۔ آرمی چیف جنرل قمر جاوید باجوہ نے امن کیلئے حالیہ اقدامات سے آگاہ کیا، اس کے علاوہ وزیراعظم کو پاک بھارت کشیدگی اور ممکنہ خطرات پر تازہ صورتحال اور کشیدگی پر ممکنہ خطرات سے نمٹنے کیلئے تیاریوں سے بھی آگاہ کیا گیا۔ وزیراعظم عمران خان نے اپنی گفتگو میں حالیہ کشیدگی میں پاک فوج کے بروقت اقدامات کو سراہا، ان کا کہنا تھا کہ قوم کو مسلح افواج کی صلاحیتوں پر پورا بھروسہ ہے۔ پاکستان اپنے دفاع کا حق آئندہ بھی استعمال کرے گا، انہوں نے پاک فضائیہ کی کارکردگی کی تعریف کی اور سمندری حدود میں پاک بحریہ کے کردار کو بھی سراہا۔ وزیراعظم عمران خان سے چیئرمین جوائنٹ چیفس آف اسٹاف کمیٹی اور سروسز چیفس کی ملاقات ہوئی ہے۔ ملک کی سکیورٹی صورتحال اور پیشہ وارانہ امور پر بات کی گئی۔ سروسز چیفس نے وزیراعظم کو ملک کی زمینی، فضائی اور بحری بارڈر کی صورتحال سے آگاہ کیا اور پاک فوج کی صلاحیت اور تیاریوں سے متعلق بھی تفصیلی بریفنگ دی گئی۔