آسکرز سال 2022 کے فاتحین کا اعلان کر دیا گیا

فلمی دنیا کے سب سے بڑے ایوارڈ آسکرز سال 2022 کے فاتحین کا اعلان کر دیا گیا ہے۔ اتوار کو امریکہ کے شہر لاس اینجلس میں آسکرز کی تقریب منعقد ہوئی۔ آسکرز کا سب سے بڑا ایوارڈ یعنیٰ بہترین فلم کا ایوارڈ ‘کوڈا’ کے نام رہا۔ اداکار وِل اسمتھ کو فلم ‘کنگ رچرڈ’ کے لیے بہترین اداکار جب کہ اداکارہ جسیکا چیسٹین کو فلم ‘دی آئز آف ٹیمی فے’ کے لیے بہترین اداکارہ کا ایوارڈ دیا گیا۔ اس کے علاوہ جین کیمپیئن کو فلم ‘دی پاور آف دی ڈوگ’ کے لیے بہترین ہدایت کار کا ایوارڈ ملا۔ آسکرز کی تاریخ میں پہلی بار قوتِ سماعت سے محروم کسی اداکار کو ایوارڈ سے نوازا گیا اور ٹروئے کوٹزر فلم ‘کوڈا’ میں بہترین معاون اداکار کا ایوارڈ حاصل کرنے میں کامیاب رہے۔ اداکارہ آریانا ڈیبوس فلم ‘ویسٹ سائڈ اسٹوری’ کے لیے بہترین معاون اداکارہ قرار پائیں۔