کسی بھی فارمیٹ سے ریٹائرنہیں ہورہا

جوہانسبرگ (اے پی پی) سٹار جنوبی افریقن بلے باز اے بی ڈی ویلیئرز نے رواں برس مارچ میں نیوزی لینڈ کے خلاف شیڈول ٹیسٹ سیریز سے عدم دستیابی ظاہر کرتے ہوئے کہا ہے کہ فی الوقت پانچ روزہ میچز سے ریٹائرمنٹ کا کوئی ارادہ نہیں رکھتا اور سو فیصد فٹ ہونے کے بعد میدانوں میں جاندار کم بیک کرنے کیلئے پر عزم ہوں۔ ڈی ویلیئرز کی ٹیسٹ کرکٹ کو خیرباد کہنے کے حوالے سے افواہیں گردش کر رہی تھیں لیکن انہوں نے انہیں مسترد کر دیا۔ اپنے ایک بیان میں انہوں نے کہا کہ بلاشبہ میری ترجیح لمیٹڈ اوورز کرکٹ ہے لیکن اس کے باوجود میں ٹیسٹ کرکٹ سے کنارہ کشی اختیار نہیں کر رہا، کیویز کے خلاف ٹیسٹ سیریز نہیں کھیلوں گا لیکن ون ڈے سیریز کیلئے ٹیم کو دستیاب ہوں گا۔ انہوں نے کہا کہ 2019ءورلڈ کپ میں ملک کی نمائندگی میرا ہدف ہے اور کوشش ہو گی کہ ٹرافی جیت کر نئی تاریخ رقم کریں۔ ڈی ویلیئرز کہنی کی سرجری کے باعث گزشتہ برس اگست سے کرکٹ میدانوں سے باہر ہیں اور انہوں نے امید ظاہر کی ہے کہ وہ سری لنکا کے خلاف تیسرے ٹی ٹونٹی میچ میں کم بیک کریں گے۔