کراچی (11 مئی 2026): پاکستان ٹیلی کمیونیکیشن نے ملک میں انٹرنیٹ سروس کے متاثر ہونے کی مدت سے متعلق انتباہ جاری کر دیا ہے۔
پاکستان ٹیلی کمیونیکیشن کمپنی لمیٹڈ (پی ٹی سی ایل) کے جاری اعلامیہ میں ملک میں آج سے 18 مئی تک شام کے اوقات میں انٹرنیٹ سروس متاثر ہونے سے متعلق انتباہ جاری کر دیا ہے۔
اعلامیہ میں کہا گیا ہے کہ ایک بین الاقوامی سب میرین کیبل میں خرابی دور کرنے کے لیے مرمتی کام کیا جا رہا ہے، جس کے باعث انٹرنیٹ کی رفتار سست ہونے یا کنیکٹیویٹی میں مسائل پیش آنے کا امکان ہے۔
کمپنی کی جانب سے سماجی رابطے کے پلیٹ فارم ایکس (سابقہ ٹوئٹر) پر جاری بیان میں بتایا گیا کہ انٹرنیشنل کیبل کنسورشیم کے تحت کی جانے والی مرمت 11 مئی سے شروع ہوگی جو 18 مئی تک جاری رہ سکتی ہے۔
کمپنی نے واضح کیا کہ خاص طور پر شام کے اوقات میں صارفین کو انٹرنیٹ کی رفتار میں کمی، بفرنگ یا سروس میں تعطل کا سامنا کرنا پڑ سکتا ہے۔
ماہرین کے مطابق پاکستان کی انٹرنیٹ ٹریفک کا بڑا حصہ زیرِ سمندر فائبر کیبلز کے ذریعے چلتا ہے، اس لیے ایسی تکنیکی خرابیوں کے اثرات ملک بھر میں محسوس کیے جا سکتے ہیں۔
Top10VPN.com کی ایک رپورٹ کے مطابق، پاکستان نے 2023 میں انٹرنیٹ اور سوشل میڈیا کی بندش اور شٹ ڈاؤن سے دنیا کا سب سے زیادہ مالی نقصان ریکارڈ کیا۔
حکومت نے حال ہی میں ملک کا پہلا ڈیجیٹل ہاؤس ہولڈ انٹیگریٹڈ اکنامک سروے (HIES) شروع کیا، جس میں کنیکٹیویٹی میں نمایاں اضافہ ہوا، جس میں اب انٹرنیٹ تک رسائی 70 فیصد گھرانوں اور 57 فیصد افراد انٹرنیٹ استعمال کرنے والے افراد میں دستیاب ہے۔
