لاہور(آئی این پی)پاکستان سپر لیگ میں اسلام آباد یونائیٹڈ اور پشاور زلمی کے درمیان فائنل میچ میں کامران اکمل نے اہم موقع پر کیچ ڈراپ کیا تو ہر جانب سے تنقید کا سلسلہ شروع ہوگیا۔ جس پر کامران اکمل بھی پھٹ پڑے اور تنقید کرنے والوں کو سخت پیغام دے دیا ہے۔کامران اکمل نے کہا کہ پورے ٹورنامنٹ میں ان کی کارکردگی انتہائی اچھی رہی اور پوری ٹیم بھی زبردست کھیلی اور صرف ایک ڈراپ کیچ پر انہیں تنقید کا نشانہ بنایا جارہا ہے۔ انہوں نے کہا کہ کیچ چھوٹنا میچ کا حصہ ہے لیکن منفی سوچ رکھنے والے کچھ لوگ اس انتظار میں ہوتے ہیں کہ بس ایک غلطی ہو اور وہ تنقید شروع کردیں۔انہوں نے کہا کہ پاکستان سپر لیگ تھری کے دوران ناصرف پشاور زلمی بلکہ ان کی اپنی کارکردگی بہت بہترین رہی اور پشاور زلمی کے مداح انہیں سراہتے رہے۔مگر ہر ایک دن اچھا نہیں ہوتا اور فائنل کے روز بھی ایسا ہی ہوا کہ کیچ ڈراپ ہوگیا اور اب منفی سوچ رکھنے والے لوگوں نے تنقید کا سلسلہ شروع کر رکھا ہے۔
