چین نے بھارت کی کوششوں پر پانی پھیر دیا ،پاکستان کی حمایت کا اعلان

بیجنگ (آئی این پی ) چین نے سہہ ملکی وزرائے خارجہ کے اجلاس میں بھارت کی تمام کاوشوں پر پانی پھیرتے ہوئے پاکستان کی حمایت کردی اور کہا ہے کہ پاکستان نے ہمیشہ دہشت گردی کی مخالفت کی ہے، پاکستان خود دہشت گردی کا شکار ملک رہا ہے، پاکستان اور بھارت کی جانب سے تحمل اور صورت حال کو مزید کشیدہ ہونے سے روکنے کی یقین دہانیوں کا خیر مقدم کرتے ہیں،چین خطے میں امن و سلامتی کے فروغ کے لیے اپنا کردار ادا کرتا رہے گا، امید ہے موجودہ صورت حال میں بھارت اور پاکستان مذاکرات سے مسئلے کا حل تلاش کرنے کی کوشش کریں گے۔ تفصیلات کے مطابق بھارت کو ایک اور ناکامی کا سامنا کرنا پڑا جب چین نے تمام تر بھارتی حربوں کے باوجود پاکستان کی حمایت کرتے ہوئے پاک وطن کو امن پسند ملک قرار دے دیا۔چینی وزیر خارجہ وانگ ای نے روس، چین اور بھارت کے وزرائے خارجہ کے اجلاس کی میزبانی کرتے ہوئے کہا کہ پاکستان نے ہمیشہ دہشت گردی کی مخالفت کی ہے، پاکستان خود دہشت گردی کا شکار ملک رہا ہے۔چینی وزیر خارجہ نے مزید کہا کہ پاکستان اور بھارت کی جانب سے تحمل کا مظاہرہ کرنے اور صورت حال کو مزید کشیدہ ہونے سے روکنے کی یقین دہانیوں کا خیر مقدم کرتے ہیں۔ چین خطے میں امن و سلامتی کے فروغ کے لیے اپنا کردار ادا کرتا رہے گا۔ چائنہ ریڈیو انٹرنیشنل کے مطابق چین کے وزیر خارجہ وانگ ای نے چین کے صوبہ زے جیانگ کے شہر وو جن میں بھارت کی وزیر خارجہ سوشما سوراج سے ملاقات کی ۔ اس موقع پر وانگ ای نے کہا کہ پچھلے سال چینی صدر مملکت شی جن پنگ اور بھارتی وزیر اعظم نریندر مودی کے درمیان چین کے شہر وو ہان میں کامیاب غیر رسمی ملاقات ہوئی جو چین بھارت تعلقات کے فروغ کے نئے دور میں داخل ہونے کی رہنمائی کر رہی ہے ۔ رواں سال فریقین کو دونوں ممالک کے رہنماوں کے اتفاق رائے پر عمل درآمد کرنا چاہیئے تاکہ چین بھارت تعلقات مستحکم طور پر آگے بڑھیں ۔ انہوں نے کہا کہ چین کو جنوبی ایشیا کی موجودہ صورتحال پر گہری تشویش ہے۔ وانگ ای نےامید ظاہر کی کہ موجودہ صورت حال میں بھارت اور پاکستان صبروتحمل کا مظاہرہ کریں گے اور مذاکرات کے ذریعے مسئلے کا حل تلاش کرنے کی کوشش کریں گے۔اس موقع پر سوشما سوراج نے کہا کہ فریقین کو سرحدی علاقے میں امن و امان کے قیام اور بھارت چین تعلقات کے مستحکم فروغ کے لئے مشترکہ کوشش کرنی چاہیئے ۔ انہوں نے کہا کہ بھارت ذمہ داری اور صبروتحمل کے ساتھ متعلقہ مسائل کے حل کے لئے کام کرے گا ۔