خیبر طورخم بارڈرپرکسٹم حکام نے ٹرک سے 1 ارب 50 کروڑ مالیت کی 130 کلوگرام ہیروئن برآمد کرلی۔ کسٹم حکام کا کہنا ہے کہ پاکستان کسٹم کی تاریخ میں پکڑی جانے والی یہ سب سے بڑی مقدار میں ہیروین ہے۔
چیف کلکٹرکسٹم احمدرضاء خان نے میڈیا سے گفتگو کرتے ہوئے کہا کہ طورخم ایمپورٹ ٹرمینل میں کسٹم عملہ نے کارروائی کرتے ہوئے ٹرک کے خفیہ خانوں سے 130 کلوگرام ہیروین برآمدکرکے ٹرک ڈرائیور کو گرفتارکرلیاہے۔
چیف کلکٹر کسٹم نے کہا کہ منشیات کی قیمت بین الاقوامی مارکیٹ میں 1 ارب 50 کروڑروپے ہے، خالی ٹرک افغانستان سے طورخم کے راستے پاکستان میں داخل ہوا تھا۔
چیف کلکٹر کسٹم احمد رضاء خان کے مطابق پاکستان کسٹم کی تاریخ میں پکڑی جانے والی یہ ہیروین سب سے زیادہ مقدار میں ہے، گزشتہ 16 روز میں کسٹم عملہ نے طورخم سرحد پر 3 ارب 23 کروڑ روپے مالیت کی منشیات پکڑی تھی۔