پشاور: خیبر پختونخوا میں آج رات سے بارشوں اور پہاڑوں پر برفباری کا سلسلہ شروع ہونے کاامکان ہے۔
محکمہ موسمیات نے ضلعی انتظامیہ اور متعلقہ اداروں کو مراسلہ ارسال کیا ہے جس میں خیبرپختون خوا میں بارشوں اور برفباری کی پیشگوئی کرتے ہوئے تنبیہہ کی گئی ہے بارشوں اور برفباری کا آج سے شروع ہونے والا سلسلہ جمعہ کے روز تک وقفے وقفے سے جاری رہنے کا امکان ہے، اس دوران بالائی علاقوں میں لینڈ سلائیڈنگ کا خدشہ ہے، جہاں لینڈ سلائیڈنگ کا خطرہ ہو وہاں پر چھو ٹی بھاری مشینری کی دستیابی یقینی بنائی جائے، لنک روڈز کی بحالی کے لیے مشینری کی دستیابی یقینی بنائی جائے، سیاح دوران سفر خصوصی احتیاطی تدابیر اختیار کریں اورموسمی صورت حال سے باخبر رہے۔
ڈی جی، پی ڈی ایم اے نے صوبائی انتظامیہ اور متعلقہ اداروں کو پیشگی اقدامات اٹھانے کی ہدایات کرتے ہوئے بتایا کہ چترال، اپردیر، سوات، مالاکنڈ، کوہستان، شانگلہ، بونیر، مانسہرہ، ایبٹ آباد، ہری پور، صوابی، مردان، نوشہرہ، پشاور، چارسدہ، کوہاٹ، باجوڑ اور کرم میں وقفے وقفے سے بارش اور ژالہ باری کاامکان ہے، جب کہ گلیات، ناران، کاغان چترال، دیر، سوات اور کرم کے پہاڑوں پر برفباری کا بھی امکان ہے۔
ترجمان پی ڈی ایم اے کا کہنا ہے کہ پی ڈی ایم اے کا ایمر جنسی آپریشن سنٹر مکمل فعال ہے، کسی بھی نا خوشگوار واقعے کی اطلاع پی ڈی ایم اے کی ھیلپ لائن 1700دیں۔
