روم: اٹلی کی وزیراعظم جارجیا میلونی کے قد پر پھبتی کسنے کے الزام میں خاتون صحافی کو 5 ہزار یورو ہرجانے کی سزا سنائی گئی ہے۔
عالمی خبر رساں ادارے کے مطابق اٹلی کے شہر میلان کی عدالت میں وزیراعظم جارجیا میلونی کا سوشل میڈیا پر ایک صحافی کی جانب سے مذاق اُڑانے کے کیس کی سماعت ہوئی۔
خاتون صحافی جیولیا کورٹیز پر الزام تھا کہ انھوں نے اپنی ایک ٹویٹ میں وزیراعظم جارجیا میلونی کے قد کا مذاق اُڑایا تھا۔ عدالت نے خاتون صحافی کو حکم دیا کہ وہ وزیراعظم جارجیا میلونی کو 5 ہزار یورو ہرجانہ ادا کریں۔
عدالت نے فیصلے میں کہا کہ خاتون صحافی جیولیا کورٹیز اس سزا کے خلاف اپیل کا حق رکھتی ہیں۔
جیولیا کورٹیز نے جارجیا میلونی کو مخاطب کرتے ہوئے کہا تھا کہ آپ مجھے دھمکا نہیں سکتیں کیوں کہ آپ کا قد محض 4 فٹ ہے جس کی وجہ آپ مجھے نظر بھی نہیں آتیں۔
خیال رہے کہ اطالوی وزیراعظم کا مذاق اُڑانے والی ٹویٹ اکتوبر 2021 میں کی گئی تھی اور اسی طرح کی ایک اور پوسٹ پر خاتون صحافی کو 1200 یورو کا معطل جرمانہ بھی عائد کیا گیا تھا۔
اطالوی وزیراعظم کے وکیل نے بتایا کہ ان کی کلائنٹ ہرجانے کی رقم ایک خیراتی ادارے کو دیں گی۔
سزا سننے کے بعد خاتون صھافی نے سوشل میڈیا پر لکھا کہ یہ اٹلی میں آزاد صحافیوں کے لیے ایک مشکل وقت ہے۔ آنے والے اچھے دنوں کی امید کرتے ہیں۔ ہم ہمت نہیں ہاریں گے۔
یاد رہے کہ اطالوی وزیراعظم کے صحافیوں کو عدالت میں گھسیٹنے کا یہ پہلا واقعہ نہیں۔
گزشتہ برس روم کی عدالت نے سب سے زیادہ فروخت ہونے والے مصنف رابرٹو ساویانو پر ایک ہزار یورو جرمانہ کے علاوہ قانونی اخراجات ادا کرنے کا حکم دیا تھا۔
