واشنگٹن کو کچھ پتا نہیں, وزیرخارجہ نے دوٹوک پیغام دیدیا

اسلام آباد (خبرنگار خصوصی) وزیر خارجہ خواجہ آصف نے کہا ہے کہ پاکستان دنیا کا واحد ملک ہے جو دہشتگردی کیخلاف جنگ جیت چکا ہے ،ایک دو واقعات ہوتے رہتے ہیں لیکن ہم یہ جنگ جیت چکے ہیں۔ سفرا کانفرنس کے بعد میڈیا کو بریفنگ دیتے ہوئے وزیر خارجہ نے کہا کہ ہم خوددار قوم ہیں، ایک ایک انچ کی ہر حال میں حفاظت کرینگے، پاکستانی قوم کو قربانی کا بکرا نہیں بننے دیں گے،خواجہ آصف نے کہا کہ امریکہ سے تعلقات ختم نہیں کر رہے،معاملات ملکی مفادات کی نظر سے دیکھیں گے، امریکا،پاکستان کی خود مختاری اور سالمیت کا احترام کرے،واشنگٹن میں بیٹھے لوگوں کو پاکستان اور خطے کی حقیقی صورتحال کا ادراک نہیں ،وزیر خارجہ کا کہنا تھا کہ پاکستان باہمی احترام کیساتھ قربانیوں کا ادراک کرنیوالے ممالک کیساتھ آگے بڑھے گا، امریکہ سمیت کسی بھی ملک سے تعلقات کو باہمی احترام پر مبنی دیکھنا چاہتے ہیں،خواجہ آصف نے کہا کہ آج چین جا رہا ہوں،دو تین روز میں ایران کا دورہ بھی کروں گااور گزشتہ روز افغان وزیر خارجہ سے رابطہ ہو اتھاجس میں ایرانی صدر اور وزیر خارجہ سے ملاقات رکھی ہے۔ انہوں نے کہا کہ اقوام متحدہ کی جنرل اسمبلی سے قبل دوست ممالک کا دورہ بھی کروں گا ، سب سے پہلی ترجیح پاکستان کو دہشتگردی سے محفوظ بنانا ہے۔ انہوں نے کہا سفراکانفرنس میں خطے کے مسائل حل کرنے کیلئے حکمت عملی طے کر لی ہے اورپاکستان ہمسایہ ممالک کے ساتھ ملکر خطے کے مسائل حل کرے گا، خواجہ آصف نے کہا کہ برکس میں جن تنظیموں کا نام لیا گیا وہ پاکستان میں کالعدم ہیں اور چین نے برکس اجلاس میںبھارت کی بہت چیزیں شامل نہیں کیں۔ انہوں نے کہا کہ تینوں دن کانفرنس میں سکیورٹی اداروں اور فوج کے نمائندے موجود تھے اور کشمیر کو ہر فورم پر اجاگر کرنے کا فیصلہ کیا ہے،وزیر خارجہ نے کہا کہ یہ کہنا غلط ہے کہ پاکستان تنہائی کا شکار ہے اوریہ غلط فہمی ہو گی کہ 40 سال کا ملبہ دنوں میں ٹھیک ہو جائے، ہم نے بیانیہ تیار کیا ہے سب کو اس سے آگاہ کریں گے، خواجہ آصف نے کہا کہ ہماری جیسی قربانیاں کسی اور ملک نے نہیں دیں،آج کراچی وزیرستان خیبریاجنسی اور باجوڑ میں امن ہے ۔ پاکستانی قوم کو قربانی کا بکرا نہیں بننے دینگے۔ خواجہ آصف کا کہنا ہے کہ خطے میں بدلتے حالات کے تحت ہی پاکستان کو نئی سِمت کا تعین کرنا ہوگا اور باہمی احترام کے ساتھ دہشت گردی کے خلاف جنگ میں پاکستان کی قربانیوں کا ادراک کرنے والے ممالک کے ساتھ ہی آگے بڑھا جائے گا۔ پاکستانی سفیروں کی تین روزہ کانفرنس کے اختتامی سیشن کے بعد پریس کانفرنس کرتے ہوئے وفاقی وزیر خارجہ خواجہ آصف نے کہا کہ پاکستان اور امریکہ کے تعلقات ختم نہیں ہوئے لیکن دونوں ملکوں کے روابط کو ملکی مفادات کی نظر سے دیکھا جائے گا جبکہ اب امریکا پر پاکستان کا انحصار کم ہوگیا ہے۔انہوں نے واضح کیا کہ پاکستان، امریکا سمیت کسی بھی ملک کے ساتھ تعلقات کو باہمی احترام پر مبنی دیکھنا چاہتا ہے۔ خواجہ آصف کا کہنا تھا کہ پاکستان ایک خود دار قوم ہے، اسے قربانی کا بکرا نہیں بننے دیں گے اور اس سرزمین کے ایک ایک انچ کی حفاظت کریں گے۔ ان کا مزید کہنا تھا کہ خطے میں بہت تبدیلیاں رونما ہو رہی ہیں اور ہمیں بھی پاکستان کے لیے دنیا کے رویے کو تبدیل کرنا ہو گا۔ عالمی دہشت گردی کا تذکرہ کرتے ہوئے خواجہ آصف نے کہا کہ صرف پاکستان دنیا کا واحد ملک ہے جو دہشت گردی کے خلاف جنگ جیت رہا ہے اس کے علاوہ دنیا کے کسی بھی ملک نے دہشت گردی کے خلاف جنگ میں کامیابی حاصل نہیں کی۔ انہوں نے واضح پیغام دیا کہ پاکستانی عوام، مسلح افواج اور قانون نافذ کرنے والے اداروں نے دہشت گردی کے خلاف جنگ میں لازوال قربانیاں دی ہیں۔ خواجہ آصف کا کہنا تھا کہ ’دہشت گردی کے خلاف عالمی جنگ میں ہم نے کھویا ہی ہے پایا کچھ نہیں، اب ہمیں بھی نئی اور درست سمت کا تعین کرنا ہوگا۔ خواجہ آصف نے بتایا کہ اس تین روزہ کانفرنس کے دوران امریکی پالیسی پر تفصیلی بات چیت ہوئی ہے اور امریکا میں تعینات پاکستانی سفیر اعزاز چوہدری نے پاکستان اور افغانستان کے لیے نئی امریکی پالیسی کو مختلف زاویوں سے واضح کیا جس کی وجہ سے معاملات کو مزید سمجھنے میں مدد ملی۔وفاقی وزیر خارجہ نے یہ بھی کہا کہ وہ یہ نہیں کہتے کہ ملک میں حالات مکمل طور پر بہتر ہیں، دنیا بے شک اعتراف نہ کرے لیکن پاکستان میں امن قائم ہے۔ پریس کانفرنس کے دوران ان کا کہنا تھا کہ کراچی سے باجوڑ تک مساجد، گاو¿ں، قصبے اور شہر امن کی جانب بڑھ رہے ہیں۔پاکستان کے سفیروں کی تین روزہ کانفرنس میں امریکا، روس، چین، سعودی عرب ،قطر، افغانستان، ایران اور بھارت سمیت مختلف ممالک میں تعینات پاکستانی سفارتکاروں نے شرکت کی۔کانفرنس کے شرکاءنے جغرافیائی سیاسی اور علاقائی صورتحال کے تناظر میں خارجہ پالیسی کی اہمیت اور اس میں مزید بہتری کے امکانات کا جائزہ لیا اور اپنی تجاویز بھی پیش کیں۔ پاکستان نے امریکی صدر ڈونلڈ ٹرمپ کی دھمکیوں کا جواب دیتے ہوئے اپنی خارجہ پالیسی میں بنیادی تبدیلی کا فیصلہ کر لیا ہے۔ وزیر خارجہ خواجہ آصف نے کہا ہے کہ امریکا کے ساتھ تعلقات میں ملکی مفاد سب سے پہلے ہو گا۔ خطے میں تبدیلیاں ہو رہی ہیں، کچھ فیصلے جلد کرنا ہوں گے۔خواجہ آصف نے بتایا کہ سفیروں کی کانفرنس میں ملک کو خارجہ سطح پر درپیش نئے چیلنجز کے تناظر میں خارجہ پالیسی مرتب کرنے کے حوالے سے مشاورت ہوئی۔ ان کا کہنا تھا کہ دنیا کو پاکستان کی قربانیوں کا قائل کرنے کے لئے بھرپور سفارت کاری کریں گے۔ پاکستانی سفیروں کو مظلوم کشمیریوں کی آواز عالمی فورمز پر اٹھانے کا ٹاسک دے دیا ہے۔ ذرائع کے مطابق وزیر اعظم شاہد خاقان عباسی نے اختتامی سیشن سے خطاب کرتے ہوئے کہا افغان مسئلے کا حل فوجی نہیں سیاسی ہے، افغانستان میں فوجی کارروائی کی حکمت عملی کامیاب نہیں ہو گی۔ انہوں نے کہا امریکی صدر کی نئی افغان پالیسی ناکام ہو جائے گی، ٹرمپ کی نئی حکمت عملی کا حال پہلے منصوبوں جیسا ہی ہو گا۔ وزیراعظم نے مزید کہا کسی کو افغان جنگ پاکستان کی سرزمین پر لڑنے کی اجازت نہیں دینگے، بھارت کو افغان سرزمین ہمارے خلاف استعمال کرنے سے روکنا ہوگا۔