کیریبین پریمیئر لیگ ، شاداب نے پہلے ہی میچ میں خود کو منوا لیا

کنگسٹن(اے پی پی) کیریبین پریمیئر لیگ شروع ہو گئی،قومی ٹیم کے لیگ سپنر شاداب خان نے کیریبیئن پریمیئر لیگ میں بھی اپنی شاندار بالنگ سے دھاک بٹھا دی ۔ برینڈن میک کولم اور کولن منرو کی جارحانہ اننگز کی بدولت ٹرنبیگو نائٹ رائیڈرز نے سینٹ لوشیا کو افتتاحی میچ میں یکطرفہ مقابلے کے بعد 9 وکٹوں سے ہرا کر فاتحانہ آغاز کیا، منرو 66 اور میک کولم 58 رنز بنا کر ناقابل شکست رہے۔ شاداب خان نے سینٹ لوشیا سٹارز کی ٹیم کے خلاف اپنے مقررہ 4اوورز کے سپیل میں محض 15رنز دے دیکر 2شکار کیے۔سی پی ایل کے ابتدائی میچ میں سینٹ لوشیا کی ٹیم نے پہلے کھیلتے ہوئے مقررہ اوورز میں 9 وکٹوں کے نقصان پر 132 رنز کا مجموعہ ترتیب دیا، فلیچر 26 اور میئرز 23 رنز بنا کر نمایاں رہے، شاداب خان اور ڈیوائن براوو نے 2، 2 وکٹیں لیں، شاداب کے سپیل کی خاص بات یہ تھی کہ انہوں نے اپنے 4اوور ز میں محض ایک چوکا کھایا اور 14گیندوں پر کوئی رن نہ بننے دیا ۔جواب میں ٹرنبیگو نائٹ رائیڈرز نے مطلوبہ ہدف 11ویں اوور میں محض ایک وکٹ کے نقصان پر حاصل کیا، میک کولم اور منرو نے جارحانہ انداز اپناتے ہوئے حریف باﺅلرز کا بھرکس نکال دیا، میک کولم نے 7 چھکوں کی مدد سے 58 اور منرو نے ناقابل شکست 66 رنز بنا کر ٹیم کو فتح دلوائی۔