مریم نواز کی دربار بی بی پاک دامن حاضری ،بدترین ٹریفک جام سے شہری پریشان

لاہور(کرائم رپورٹر)این اے 120میں انتخابی مہم میں تیزی ، مریم نواز کی بی بی پاکدامن مزار پر حاضری ، پھولوں کی چادر چڑھائی اور فاتحہ خوانی کی ، اس موقع پر سکیورٹی انتظامات انتہائی سخت رکھے گئے جبکہ مال ر وڈ ، ڈیوس روڈ اور ایبٹ روڈ سمیت دیگر ملحقہ شاہراﺅں پر بدترین ٹریفک جام رہی ۔بتایا گیا ہے کہ این اے 120کے ضمنی انتخابات کی تاریخ قریب آتے ہی سیاسی جماعتوں کی انتخابی مہم میں بھی تیزی آگئی ہے ۔ اسی حوالے سے گزشتہ رات مریم نواز نے بیبیاںپاکدامن مزار پر حاضری دی جہاں انھوں نے پھولوں کی چادر چڑھائی اور فاتحہ خوانی کی ۔ اس موقع پر انھوں نے اپنی والدہ کی صحت یابی کیلئے خصوصی دعا بھی کی ۔ اس موقع پر سکیورٹی کے سخت ترین انتظامات کیئے گئے جبکہ چھتوں پر سنائپرز تعینات تھے اور سادہ کپڑوں میں بھی قانون نافذ کرنے والے اداروں کے اہلکار ڈیوٹیاں سرانجام دیتے رہے ۔ مریم نواز کی جانب سے بیبیاں پاکدامن حاضری کے موقع پر مزار کی جانب جانےوالے تمام راستے بند کر دیے گئے جس کی وجہ سے مال روڈ ، جیل روڈ ، اپر مال ، بیڈن روڈ ، ہال روڈ ، لارنس روڈ ، ڈیوس روڈ اور ایبٹ روڈ سمیت دیگر ملحقہ شاہراﺅں پر بدترین ٹریفک جام رہی اور گاڑیوں کی لمبی لائنیں لگی ر ہیں ۔اس موقع پر ٹریفک پولیس کے افسران واہلکار ٹریفک کی روانگی کو برقرار رکھنے کی کوشش کرتے رہے تاہم مریم نواز کی جانب سے بیبیاں پاکدامن مزار پر حاضری کے بعد اپنی انتخابی مہم کا باقاعدہ آغاز کیا گیا ۔