کراچی (خصوصی رپورٹ) امریکہ میں سازشی نظریات کا پرچار کرنے والے مصنف ڈیوڈ میڈ نے سورج گرہن کے بعد پیش آنے والے واقعات کا ذمہ دار موت کے سیارے کو قرار دیتے ہوئے خبردار کیا ہے کہ 23ستمبر کو دنیا تباہ ہوجائے گی کیونکہ موت کا سیارہ زمین سے ٹکرا جائے گا۔ برطانوی خبررساں ادارے کی رپورٹ کے مطابق اگرچہ ڈیوڈ میڈ کی پیش کردہ تھیوری سے کسی سائنسدان نے اتفاق نہیں کیا لیکن ان کی پیش کردہ رپورٹ کی وجہ سے کئی لوگ حیران و پریشان نظر آتے ہیں۔ ان کا کہنا ہے کہ موت کا سیارہ فی الوقت خفیہ ہے اور اس کا نام نبیرو (Nibiru) ہے۔ ان کا کہنا ہے کہ موت کا کھیل 23 ستمبر کو اس وقت شروع ہو جائے گا جب نبیرو آسمان پر نظر آنا شروع ہوگا۔ ایک ریڈیو چینل پر انٹرویو دیتے ہوئے ڈیوڈ میڈ کا کہنا تھا کہ انہوں نے پیرس میں ایک ماہر فلکیات پروفیسر سے تبادلہ خیال کیا ہے اور انہوں نے بھی نبیرو سیارے کو حقیقت قرار دیا۔ انہوں نے کہا کہ بائبل اور اہرام مصر سے حاصل ہونے والے فلکی چارٹ سے بھی نبیرو کی سچائی کی تصدیق ہوتی ہے۔ واضح رہے کہ نبیرو کو Planet X بھی کہا جاتا ہے جو زمین سے ٹکرا کر نسلِ انسانی کو ختم کر دے گا اور آفات اسی تباہی کی شروعات ہیں۔ ڈیوڈ میڈ کی اس پیش گوئی کے بعد سے کئی لوگوں نے انٹرنیٹ پر اس حوالے سے معلومات حاصل کرنا شروع کر دی ہیں اور ان کی یہ خبر تیزی سے وائرل ہوگئی ہے۔
