لاہور(سی پی پی)پاکستان کرکٹ بورڈ کے چیئرمین نجم سیٹھی نے کہاہے کہ انگلینڈ کیخلاف ٹیسٹ سیریز برابر کرنا بڑی کامیابی ہے ،ہماری ٹیم نوجوان کھلاڑیوں پر مشتمل ہے اور سیکھنے کے مراحل سے گزر رہی ہے ،سر فراز احمد ورلڈکپ 2019 تک پاکستان ٹیم کے کپتان برقرار رہیں گے۔ ان خیالات کا اظہار انہوں نے ایک انٹر ویو کے دوران کیا۔ نجم سیٹھی نے کہاکہ آئرلینڈ کرکٹ بورڈ کی جانب سے ٹیسٹ میچ دیکھنے کی دعوت پر وہاں گئے تھے لیکن اس مرتبہ ٹیم کے ساتھ دورہ کچھ زیادہ طویل ہوگیا۔انہوں نے کہا کہ میں نے ہمیشہ کپتان سرفراز احمد کو سپورٹ کیا ہے ، سرفراز کے علاوہ ہماری ٹیم میں کوئی بھی کھلاڑی کپتانی کا اہل نظر نہیں آتا،،میرا پورا اعتماد سرفراز احمد پر ہی ہے۔ چیئرمین پی سی بی نے مزید کہا کہ کرکٹ گرانڈز کے بارے میں بھی پالیسی بنالی گئی ہے ،کرکٹ کمیٹی فیصلہ کرے گی کہ سٹیڈیم کی پچز پر کتنے میچز کھیلے جاسکتے ہیں، اگر پی سی بی کو گراﺅنڈ کی ضرورت ہے تو کسی کو بھی گراﺅنڈ نہیں ملے گا۔انہوں نے بتایا کہ پی ایس ایل فرنچائززکی مدد کرنے کے لیے تیار ہیں۔ انتخابات اور پھر نئی حکومت آنے کے بعد نجم سیٹھی چیئرمین برقرار رہیں گے ، اس سوال پر انہوں نے بتایا کہ میں نے اپنا کام پوری ایمانداری سے کیا ہے۔چیئرمین پی سی بی نے کہا کہ اعلی معیار کے ڈسپلن اور بہتر مستقبل کیلیے عزم کی بدولت ہم بہت جلد دنیا کی مضبوط ترین ٹیموں میں شمار ہوں گے، ابھی کئی خامیاں ہوں گی جنھیں وقت اور تجربے کیساتھ دور کر لیں گے، پاکستان کرکٹ درست سمت میں گامزن ہے۔

، میری کوششوں کا بالآخر اچھا نتیجہ سامنے آنے پر میڈیا میں تنقید بھی ختم ہوجائیگی۔نجم سیٹھی نے کہا کہ ہیڈ کوچ مکی آرتھر کے ساتھ معاہدہ ورلڈ کپ 2019 تک کا ہے۔ اس میں توسیع کا فیصلہ فریقین کو مل کر ہی کرنا ہوگا، میرے خیال میں غیرملکی کوچ بہترین کام کر رہے ہیں، معاون اسٹاف بھی اپنا کردار کر رہا ہے۔

ماسکو(سی پی پی)فٹبال ورلڈ کپ کھیلنے والی سعودی عرب کی ٹیم کی دوسرے میچ کے لیے ایک شہر سے دوسرے شہر روانگی کے دوران طیارے کے انجن میں آگ بھڑک اٹھی تاہم کھلاڑی محفوظ رہے۔ سعودی نیشنل فٹبال ٹیم کو کل ایونٹ کا دوسرا میچ یوروگوئے کے خلاف آج کھیلنا ہے جس کیلئے ٹیم ایئربس اے 319 کے ذریعے سینٹ پیٹربرگ سے روستوف جارہی تھی کہ دوران پرواز جہاز کے ایک انجن میں اچانک آگ بھڑک اٹھی جس کے بعد طیارے کو ہنگامی طور پر روستوف کے ڈون ایئرپورٹ پر لینڈ کرادیا گیا۔دوسری جانب روسیا ایئر لائن کے ترجمان نے جہاز کے انجن میں آگ لگنے کی خبروں کی تردید کی۔

اور کہا کہ جہاز کے ساتھ پرندہ ٹکرانے کے باعث ایک انجن میں خرابی واقع ہوئی۔ترجمان نے کہا کہ طیارے کی معمول کے مطابق لینڈنگ ہوئی جس کے دوران ہنگامی وارننگ جاری نہیں کی گئی اور مسافروں کو بحفاظت ایئرپورٹ پر اتارا گیا۔ سعودی فیڈریشن کے بیان میں کہا گیا ہے کہ طیارے کے انجن میں آگ لگ گئی تھی تاہم تمام کھلاڑی محفوظ ہیں جو اپنے مقام تک بحفاظت پہنچ چکے ہیں۔

اسلام آباد(سی پی پی)رکنی قومی کبڈی ٹیم ماسٹر کبڈی کپ میں شرکت کیلئے آج بدھ کو دبئی روانہ ہوگی۔ پاکستان کبڈی فیڈریشن کے سیکرٹری جنرل محمد سرور رانا کے مطابق قومی ٹیم کا دستہ 18 ارکان پر مشتمل ہوگا جس میں 14کھلاڑی اور 4 آفیشلز شامل ہیں ٹیم کی قیادت ناصر علی کریں گے۔ کوچنگ کے فرائض کرنل نبیل احمد، ٹیم منیجر کے رانا امجد علی اور ریفری کے بادشاہ گل انجام دیں گے۔ٹورنامنٹ میں 6 ممالک کی ٹیمیں حصہ لیں گی۔

جن کو دو گروپوں میں تقسیم کیا گیا ہے گروپ اے میں پاکستان کے ساتھ روایتی حریف بھارتاور کینیا کو رکھا گیا ہے جبکہ گروپ بی میں ایران،، جنوبی کوریا اور ارجنٹائن شامل ہیں۔ پاکستان روایتی حریف بھارت کے خلاف 22 جون کھیلے گا۔ یہ ٹورنامنٹ 30 جون تک جاری رہے گا۔

لندن (نیوزایجنسیاں)پاکستان کے سابق فاسٹ باﺅلر اور ہیڈ کوچ وقار یونس نے کہا ہے کہ پاکستان کرکٹ ٹیم کے 2019ءورلڈکپ جیتنے کی اچھی امیدیں موجود ہیں۔میڈیا سے گفتگو کرتے ہوئے وقار یونس نے کہا کہ انگلینڈ اینڈ ویلز میں کھیلا جانے والا ورلڈکپ 2019ءایک سخت ٹورنامنٹ ہو گا۔ انہوں نے کہا کہ ”ہوم کنڈیشنز میں انگلینڈ خطرناک ٹیم ہے اور گزشتہ کچھ ورلڈکپ میزبان ٹیم نے ہی جیتے ہیں لیکن دیگر ٹیمیں بھی بہترین تیاری کیساتھ ٹورنامنٹ کھیلنے آئیں گی۔“وقار یونس نے کہا کہ اگلے ورلڈکپ میں بہترین مقابلے دیکھنے کو ملیں گے جبکہ پاکستانی ٹیم سے متعلق گفتگو کرتے ہوئے وقار یونس نے کہا کہ گرین شرٹس نے انگلینڈ میں چیمپینز ٹرافی 2017ءجیتی اور اب وہ کنڈیشنز کے بارے میں جانتے ہیں اور یہ ظاہر بھی کر چکے ہیں کہ وہ ان کنڈیشنز میں بہترین کرکٹ کھیل سکتے ہیں۔وقار یونس نے کہا کہ ”پورے ملک کی جانب سے ٹیم پر دباﺅہو گا کیونکہ اس مرتبہ توقعات بہت زیادہ ہیں جبکہ انگلینڈ میں پاکستانیوں کی ایک بڑی تعداد مقیم ہے جو اپنی ٹیم کو سپورٹ کرنے کیلئے میدانوں کا رخ کرے گی۔ دباﺅہو گا لیکن لڑکے اس دباﺅ سے گھبرانے کے بجائے لطف اندوز ہوں گے۔

ناٹنگھم(نیوزایجنسیاں) انگلینڈ نے آسٹریلیا کے خلاف 481 رنز بناکر ون ڈے کرکٹ کا نیا ریکارڈ قائم کردیا۔یہ پہلا موقع ہے جب کسی بھی ٹیم نے ایک روزہ کرکٹ میں 450 کا ہندسہ عبور کیا۔انگلینڈ کی جانب سے ایلکس ہیلز نے 147 جبکہ جونی بیئرسٹو نے 139 رنز کی جارحانہ اننگز کھیلیں۔اس کے علاوہ جیس روئے 82 اور کپتان اوئن مارگن 67 رنز کے ساتھ نمایاں رہے۔آسٹریلوی بولرز انگلش بلے بازوں کے ہاتھوں بالکل بے بس نظر آئے۔ بولر انڈریو ٹائی نے 9 اوورز میں 100 رنز دیے جبکہ جھائی رچرڈسن نے اپنے مقررہ 10 اوورز میں 92 رنز دیے۔اس سے قبل انگلینڈ ہی کے پاس یہ ریکارڈ تھا جو اس نے 2016 میں پاکستان کے خلاف 444 رنز کی صورت میں بنایا تھا۔اس میچ میں بھی ایلکس ہیلز نے پاکستانی گیند بازوں کی جم کر پٹائی کی تھی اور 171 رنز کی شاندار اننگز کھیلنے میں کامیاب رہے تھے۔میچ میں وہاب ریاض نے اپنے مقررہ 10 اوورز میں 110 رنز دیے تھے۔

سرانسک (نیوزایجنسیاں)فیفا ورلڈ کپ میں شریک ایشین سپر پاور ٹیم جاپان نے میگا ایونٹ میں فاتحانہ آغاز کیا ہےجبکہ سینی گال نے پولینڈکو حیران کن طورپر 2-1سے زیرکیا۔جاپان نے روس میں جاری فٹبال ورلڈ کپ میں اپنے پہلے میچ میں فیورٹ کولمبیا کو ایک کے مقابلے میں دو گولز سے شکست دے دی۔گروپ ایچ کے میچ میں جاپان اور کولمبیا مدمقابل آئے تاہم کھیل کے تیسرے ہی منٹ میں کولمبیا کو بڑا دھچکا اس وقت لگا جب ریفری نے جاپان کے کھلاڑی شنجی کاگاوا کا شاٹ اپنے ہاتھ سے روکنے پر کولمبیا کے اہم مڈفیلڈر کارلوس سینشز مورینو کو ریڈ کارڈ دکھا کر گراو¿نڈ سے باہر بھیج دیا گیا۔1986 ورلڈ کپ کے بعد یہ کسی کھلاڑی کو دکھایا جانے والا تیز ترین ریڈ کارڈ ہے جو کھیل کے تیسرے ہی منٹ میں دکھایا گیا۔ 1986 میں کھیل کے 54 ویں سیکنڈ میں یوروگوائے کے جوز البرٹو بتیستا کو ریڈ کارڈ دکھایا گیا تھا۔کارلوس سینشز کو ریڈ کارڈ دکھائے جانے کے بعد کولمبیا کو بقیہ پورا میچ 10 کھلاڑیوں کے ساتھ کھیلنا پڑا اور اس کا بھرپور فائدہ جاپان نے اٹھایا۔کارلوس سینشز کے ریڈ کارڈ کے عوض جاپان کو پینلٹی کک دی گئی جس پر جاپانی مڈفیلڈر شنجی کاگاوا نے گیند کو جال کی راہ دکھا کر اپنی ٹیم کو 0-1 کی برتری دلادی۔ یہ گول کھیل کے چھٹے منٹ میں ہوا۔ابتدائی طور پر دھچکا لگنے کے باوجود کولمبیا کے کھلاڑیوں نے ہمت نہیں ہاری سخت محنت جاری رکھی جس کا صلہ انہیں 39 ویں منٹ میں مل گیا جب مڈفیلڈر یوآن فرنینڈو کوئنٹیرو نے فری کک پر گول کرکے جاپان کی سبقت ختم کردی، ہاف ٹائم تک مقابلہ 1-1 سے برابر رہا۔کھیل کے 70 ویں منٹ میں جاپان نے مڈفیلڈر شنجی کاگاوا کی جگہ تجربہ کار کھلاڑی کیسوکے ہونڈا کو طلب کیا جنہوں نے 73 ویں منٹ میں اسٹرائیکر یویا اوساکو کو بہترین پاس دیا جسے انہوں نے گول میں تبدیل کرنے میں کوئی کوتاہی نہیں کی۔اس گول کے ساتھ جاپان کی برتری 1-2 ہوگئی جو میچ کے اختتام تک برقرار رہی اور جاپان یہ میچ جیت کر تین پوائنٹس کا حقدار ٹھہرا۔