راولپنڈی (صباح نیوز) پاک فوج کے 6لیفٹیننٹ جنرلز کے تبادلے اور تقرریاں کی گئی ہیں۔پاک فوج کے شعبہ تعلقات عامہ (آئی ایس پی آر)کے مطابق پاک فوج میں اعلی سطح پر تقرر و تبادلے کیے گئے ہیں جس کے تحت لیفٹیننٹ جنرل ہمایوں عزیز کور کمانڈر کراچی جبکہ لیفٹیننٹ جنرل شاہد بیگ مرزا آئی جی کمیونیکیشن و آئی ٹی مقرر کردیئے گئے ہیں۔آئی ایس پی آر کے مطابق لیفٹیننٹ جنرل بلال اکبر کو کور کمانڈر راولپنڈی اور لیفٹیننٹ جنرل ندیم رضا کو چیف آف جنرل اسٹاف مقرر کردیا گیا، لیفٹیننٹ جنرل نعیم اشرف کور کمانڈر ملتان جبکہ لیفٹیننٹ جنرل عبداللہ ڈوگر کو چیئرمین ہیوی انڈسٹریز ٹیکسلا تعینات کر دیاگیا ہے۔آئی ایس پی آر کی جانب سے جاری بیان کے مطابق لیفٹیننٹ جنرل شاہد بیگ مرزا اس سے قبل کمانڈر فائیو کور، لیفٹیننٹ جنرل بلال اکبر چیف آف جنرل اسٹاف جبکہ لیفٹیننٹ جنرل ندیم رضا پہلے کمانڈر ٹین کور تعینات تھے۔ لیفٹیننٹ جنرل عبداللہ ڈوگر پہلے کمانڈر کور 2، لیفٹیننٹ جنرل ہمایوں عزیز آئی جی کمیونیکیشن و آئی ٹی اور لیفٹیننٹ جنرل نعیم اشرف چیئرمین ایچ ای ٹی تعینات تھے۔اسلام آباد(وقائع نگار خصوصی)حکومت نے سیکرٹری اسٹیبلشمنٹ ڈویژن اورنگزیب حق کو عہدے سے ہٹا کر ان کی جگہ ڈاکٹر اعجاز منیر سیکرٹری اسٹیبلشمنٹ ڈویژن تعینات کر دیا۔جمعہ کو سیکرٹری اسٹیبلشمنٹ ڈویژن کو ان کے عہدے ہٹا دیا گیا ان کی جگہ تعینات کیے جانے والے ڈاکٹر اعجاز منیر سیکرٹری ایوی ایشن ڈویژن تعینات تھے جبکہ اورنگزیب حق کو اسٹیبلشمنٹ ڈویژن رپورٹ کرنے کی ہدایت کی گئی ہے۔ وفاقی حکومت نے سیکرٹری اسٹیبلشمنٹ ڈویژن اور سیکرٹری ایوی ایشن ڈویژن سمیت متعدد افسران کے تبادلوں کے احکامات جاری کر دیئے ہیں۔ اسٹیبلشمنٹ ڈویژن سے جاری نوٹیفکیشن کے مطابق پاکستان ایڈمنسٹریٹو سروس کے گریڈ 22 کے آفیسر اورنگزیب حق کو سیکرٹری اسٹیبلشمنٹ ڈویژن سے تبدیل کر کے انہیں اسٹیبلشمنٹ ڈویژن رپورٹ کرنے کی ہدایت دی گئی ہے جبکہ پاکستان ایڈمنسٹریٹو سروس کے گریڈ 22 کے آفیسر اعجاز منیر کو سیکرٹری ایوی ایشن ڈویژن سے تبدیل کر کے سیکرٹری اسٹیبلشمنٹ ڈویژن تعینات کر دیا ہے۔ پاکستان ایڈمنسٹریٹو سروس کے گریڈ 19 کے آفیسر زاہد بن مقصود کی خدمات پنجاب حکومت سے واپس لے کر انہیں ڈپٹی سیکرٹری وزیراعظم آفس تعینات کر دیا گیا ہے۔ پاکستان ایڈمنسٹریٹو سروسز کے گریڈ 20 کے آفیسر محمد زبیر ہاشمی کو نیکٹا سے تبدیل کر کے وفاقی تعلیم و پیشہ ورانہ تعلیم ڈویژن میں تعینات کر دیا ہے۔

اسلام آباد(ویب ڈیسک ) اپوزیشن جماعتوں کے اتحاد ‘پاکستان الائنس’ کا اہم اجلاس آج مری میں ہونے جارہا ہے، جس کے دوران صدارتی انتخاب کی حکمت عملی کا جائزہ لینے کے ساتھ ساتھ حزب اختلاف کی جانب سے مشترکہ صدارتی امیدوار لانے پر بات چیت کی جائے گی۔مسلم لیگ (ن) کے صدر شہباز شریف کی صدارت میں ہونے والی ک±ل جماعتی کانفرنس میں پاکستان پیپلز پارٹی (پی پی پی) ، متحدہ مجلس عمل (ایم ایم اے)، عوامی نیشنل پارٹی (اے این پی)، پختونخواہ میپ، نیشنل پارٹی، قومی وطن پارٹی اور پاک سرزمین پارٹی کے مرکزی رہنما شریک ہوں گے۔اجلاس میں ایم ایم اے کا تین رکنی وفد شرکت کرے گا، جبکہ محمود خان اچکزئی کوئٹہ میں مصروفیت کے باعث شریک نہیں ہو سکیں گے۔(ن) لیگ نے صدارتی امیدوار کیلئے اعتزاز احسن کا نام مسترد کردیا۔ذرائع کے مطابق مسلم لیگ (ن) اجلاس میں صدارتی انتخابات کے لیے پیپلز پارٹی کے نامزد امیدوار اعتزاز احسن کی جگہ متفقہ امیدوار لانے پر زور دے گی۔اجلاس میں صدارتی انتخابات کی حکمت عملی طے کرنے کے ساتھ یہ مشاورت بھی کی جائے گی کہ سینیٹ میں اپوزیشن جماعتوں کی اکثریت کے باعث متفقہ چیئرمین سینیٹ اور اپوزیشن لیڈر لانے کے لیے کب کارروائی شروع کی جائے۔ذرائع کا کہنا ہے کہ اجلاس میں عام انتخابات میں مبینہ دھاندلی کے خلاف پارلیمان اور اس سے باہر احتجاج کی حکمت عملی پر بھی غور کیا جائے گا۔ذرائع کے مطابق مسلم لیگ (ن) ‘نواز شریف کو انصاف دو’ نامی احتجاجی تحریک کے لیے الائنس میں شامل دیگر جماعتوں سے تعاون طلب کرے گی، خاص طور پر (ن) لیگ اور پیپلز پارٹی کے ایک ساتھ چلنے کی حکمت عملی بھی زیر غور آئے گی۔مسلم لیگ (ن) اتحاد میں شامل جماعتوں کی قیادت کو راولپنڈی میں جلد ہی ہونے والے احتجاجی جلسے سمیت مستقبل کے احتجاجی جلسوں میں شرکت کی دعوت بھی دے گی۔صدارتی انتخاب واضح رہے کہ صدارتی انتخاب کے لیے پارلیمنٹ کا مشترکہ اجلاس 4 ستمبر کو طلب کیا گیا ہے۔21 اگست کو پارٹی صدر شہباز شریف کی زیر صدارت ہونے والے اجلاس میں مسلم لیگ (ن) نے صدارتی امیدوار کے لیے اعتزاز احسن کی نامزدگی مسترد کرتے ہوئے کہا تھا کہ پیپلز پارٹی نے اعتزاز احسن کے نام پر اعتماد میں نہیں لیا۔

لاہور (مانیٹرنگ ڈیسک) رہنما پی ٹی آئی انجینئر افتخار چوہدری نے چینل فائیو کے پروگرام نیوز ایٹ سیون میں گفتگو کرتے ہوئے کہا ہے کہ عمران خان نے بائیس سالہ جدوجہد میں عوام کی خدمت کرنا سیکھا ہے۔ عمران خان کے لیے عید کی چھٹیاں معنی نہیں رکھتیں، وزرا اور اپنی ٹیم کی دوڑ لگوا دیں گے۔ عمران خان پرانی طرز کے وزیراعظم نہیں ، غلطی ہوئی کہ انکی عید کی نماز پڑھنے کی ویڈیو نہیں بنائی گئی۔ عمران خان نے سو دنوں کے لیے چھ نکاتی ایجنڈے کا اعلان کیا ہے۔ عمران خان نے جس دن حلف لیا اس دن انہوں نے نئی کرولا گاڑی ذاتی استعمال کے لیے لی ، سرکاری گاڑی استعمال نہ کر کے سادگی کی مثال عمران خان بنیں گے۔ اسی گاڑیاں ہمارے لیے درد سر بنی ہوئی ہیںکہ انہیں کون خریدے گا۔ غیر ملکی مہمانوں کےلیے ہمارے وزرا اپنی گاڑیاں دیں گے۔ نواز شریف مغل بادشاہوں کی طرح گاڑیاں لٹاتے رہے ہیں۔ میاں نواز شریف نے وزیراعظم ہاوس کا کوئی خرچہ اپنی جیب سے نہیں کیا۔ اب وزیر بھی عام لوگوں کی طرح زندگی گزاریں گے۔ اپنی کارکردگی پر کے پی کے میں کلین سویپ کیا۔ اس الیکشن میں ہمارا مینڈیٹ چرایا گیا ہے، حلقے کھلوائیں گے۔ ن لیگ کے لوگوں میں دھرنوں کے لیے گرمی میں سڑکوں میں آنے کی ہمت نہیں، صرف دس دن کا دھرنا کر کے دکھا دیں۔ ایک سوال پر انہوں نے کہا کہ پاکستانی حکومت امریکا کے ڈالروں پر پلنے والی حکومت نہیں، امریکا کسی غلط فہمی میں نہ رہے، امریکا کے ساتھ برابری کی سطح پرتعلقات چاہتے ہیں۔ ن لیگ کی حکومت میں وزیر خارجہ نہ ہونے کے خمیازہ قوم کلبھوشن کی شکل میں بھگت رہی ہے۔ انہوں نے کہا کہ عوام کے لوٹے ہوئے پیسے کو آڈٹ ہوگا۔ حکومت کو ملکی قرضے اتارنے کے لیے آئی ایم سے قرض لینا پڑے گا۔ مسلم لیگ ن کی رہنما رومینیا خورشید احمد نے کہا کہ گاڑیاں غیر ملکی مہمانوں کے لیے اپنے گھر کی عزت اور وقار کے لیے ہیں، نواز شریف کبھی حکومتی یا عوام کے پیسوں سے کھانوں کا خرچہ نہیں کرتے تھے۔ گورنر ہاوسز ملک کا اثاثہ ہیں۔ گورنر ہاوسز ختم کرنے کی بات کرنے والوں نے کے پی کے میں کیوں گورنر ہاوس ختم نہیں کیا۔ مسلم لیگ ن کے بہت سے وزرا نے پروٹوکول نہیں لیا۔ نواز شریف نے مینڈیٹ کا احترام کیا اور تحریک انصاف کو کے پی کے میں حکومت بنانےدی گئی۔الیکشن مینڈیٹ کو تمام سیاسی جماعتوں نے رد کیا۔ کے پی کے کے الیکشن میں دھاندلی کے خلاف کمیشن بنایا جائے۔ ن لیگ تحریک انصاف کی طرح ملک کی املاک کو نقصان پہنچانے کے لیے دھرنا نہیں دے سکتی۔ امریکی صدر ٹرمپ کے پاس دماغ نہیں ہے، امریکی متنازعہ بیان کی مذمت کرتے ہیں۔ امریکا اپنا قبلہ درست کرے۔ پاکستان بنانا ری پبلک نہیں ایک آزاد قوم ہے جواپنے ملک کی حفاظت کرنا جانتی ہے۔ انہوں نے کہا کہ پاکستان میں وزیراعظم کا عہدہ کانٹوں کا تاج ہے۔ خواہش ہے کہ پاکستان میں وہ وقت آئے کہ کوئی قرضہ نہ لینا پڑے۔ پروگرام کے دوران انجینئیر افتخار نے مسلم لیگ ن کی رکن رومینیا خورشید کے مثبت رویہ اور تعلیم یافتہ شخصیت ہونے پر تحریک انصاف میں شمولیت کی دعوت بھی دی۔ جسے انہوں نے پاٹی کے احسانات ہونے کے عوض قبول کرنے سے انکار کردیا۔