جنوبی افریقہ نے زمبابوے کو ون ڈے سیریز میں وائٹ واش کر دیا

پارل(آئی این پی) جنوبی افریقہ نے زمبابوے کو تیسرے اور آخری ایک روزہ بین الاقوامی کرکٹ میچ میں 4 وکٹوں سے شکست دے کر سیریز میں 3-0 سے وائٹ واش کر دیا، فاتح ٹیم نے 229رنز کا ہدف 45.5اوورز میں 6وکٹوں کے نقصان پر پورا کیا، ہینڈرکس نے 66اور کلاسن نے 59رنز کی اننگز کھیل کر ٹیم کی جیت میں اہم کردار ادا کیا، سین ولیمز کی69رنز کی اننگز رائیگاں گئی، سٹین اور ربادا نے تین، تین کھلاڑیوں کو آﺅٹ کیا۔ہفتے کو پارل میں کھیلے گئے تیسرے اور آخری ایک روزہ میچ میںزمبابوین قائد ہملٹن مسکڈزا نے ٹاس جیت کر پہلے بیٹنگ کا فیصلہ کیا جو ان کیلئے مہنگا ثابت ہوا، زمبابوین ٹیم پہلے کھیلتے ہوئے 49.3 اوورز میں 228 رنز بنا کر آﺅٹ ہو گئی، سین ولیمز کے سوا زمبابوے کا کوئی بھی کھلاڑی پروٹیز باﺅلرز کا ڈٹ کر مقابلہ نہ کر سکا، ولیمز 69 رنز بنا کر نمایاں رہے، مسکڈزا 28، سولومون میر 7، کریگ ایرون بغیر کوئی رن بنائے، برینڈن ٹیلر 40، پیٹر مور 10، ایلٹن چیگمبرا 9، ٹریپانو 29، ماووتا 18 اور کائل جروس 8 رنز بنا کر آﺅٹ ہوئے، ڈیل سٹین اور کگیسوربادا نے 3، 3 عمران طاہر اور پہلک وایو نے 2، 2 وکٹیں لیں۔جواب میں جنوبی افریقن ٹیم نے مطلوبہ ہدف 46ویں اوور میں 6 وکٹوں پر حاصل کیا، ایڈن مارکرم اور ہینڈرکس نے شاندار بلے بازی کا مظاہرہ کرتے ہوئے ٹیم کو 75 رنز کا آغاز فراہم کر کے اس کی جیت کی بنیاد رکھی، ہینڈرکس 66 اور کلاسن 59 رنز بنا کر نمایاں رہے، مارکرم 42، کپتان ڈوپلیسی 26، جے پی ڈومینی ایک رن بنا کر آﺅٹ ہوئے، پہلک وایو بغیر کوئی رن بنائے آﺅٹ ہوئے، زونڈو 25 اور سٹین 4 رنز بنا کر ناٹ آﺅٹ رہے، ٹریپانو نے 2 جبکہ جروس، چتارا، ماووتا اور ولیمز نے ایک، ایک وکٹ لی۔