وزیراعظم عمران خان کا لاہور میں اپنا گھر خود بنانا، سادگی کی مثال

لاہور (تجزیہ نگار) گزشتہ رات قارئین خبریں کے دفاتر میں فون کر کے پوچھتے رہے کہ وزیراعظم عمران خان تو لاہور میں ذاتی گھر اپنے خرچ سے بنا رہے ہیں یہ ان کی حکومت کی سادگی کی اعلیٰ مثال ہے۔ لیکن گزشتہ روز پنجاب اسمبلی میں جو بل پاس کیا گیا اس میں وزیراعلیٰ، سپیکر صوبائی اسمبلی، ڈپٹی سپیکر اور ارکان اسمبلی کی تنخواہوں اورمراعات میں جو اضافہ کیا گیا ہے یہ حکومتی پالیسیوں کے مطابق ہرگز نہیں ہے۔ پی ٹی آئی حکومت کا عمران خان کی اپنی ذات کی حد تک سادگی اور کفایت شعاری کا معاملہ قابل تحسین ہے اور قوم ان کی معترف بھی ہے مگر پنجاب اسمبلی میں ارکان کی تنخواہوں اور مراعات کا اضافہ ہونا اور فوری منظور ہو جانا ہے غریب ملک کے عوام کے ساتھ زیادتی ہے اور خود پی ٹی آئی حکومت کی پالیسیوں کی نفی ہے۔ اس سے تو اب سابق وزراءاعلیٰ شہباز شریف، پرویز الٰہی اور موجودہ وزیراعلیٰ بھی اس مراعات سے مستفید ہوں گے۔ یہ اس ملک کی معیشت پر بوجھ ہو گا بلکہ کفایت شعاری اور سادگی کی پالیسیوں کو بریک لگانے کے مترادف ہو گا۔ قارئین کی رائے ہے کہ وزیراعظم عمران خان پنجاب کے معاملات خود دیکھ رہے ہیں۔ اس اقدام پر غور کریں۔