عدم اعتماد کے روز انتشار کا خدشہ، سپریم کورٹ بار نے آئینی درخواست تیار کر لی

اسلام آباد : (ویب ڈیسک) سپریم کورٹ بار نے تحریک عدم اعتماد پر ووٹنگ کے روز تصادم روکنےکے لیے آئینی درخواست تیار کر لی ہے۔
صدر سپریم کورٹ بار کا کہنا ہے کہ عدم اعتماد سے متعلق درخواست آج سپریم کورٹ میں دائر کی جائے گی، درخواست میں وزارت داخلہ، وزارت دفاع، آئی جی اور ڈپٹی کمشنر اسلام آباد کو فریق بنایا جائے گا۔
درخواست کا مسودے میں کہا گیا ہے کہ عدم اعتماد کا عمل پرامن انداز سے مکمل ہو، عدم اعتماد آرٹیکل 95 کے تحت کسی بھی وزیراعظم کو ہٹانے کا آئینی راستہ ہے۔مسودے میں کہا گیا ہے کہ سیاسی بیانات سے عدم اعتماد کے روز فریقین کے درمیان تصادم کا خطرہ ہے، سپریم کورٹ تمام اسٹیک ہولڈرز کو عدم اعتماد کا عمل پرامن انداز سے کرنے کا حکم دے۔
خیال رہے کہ وفاقی وزیر اطلاعات فواد چوہدری کی جانب سے ایک بیان میں کہا گیا تھا کہ تحریک عدم اعتماد میں عمران خان کے خلاف ووٹ ڈال کر آنے والوں کو 10 لاکھ سے مجمعے سے گزر کر جانا ہو گا۔
دوسری جانب اپوزیشن جماعتوں نے بھی پاکستان تحریک انصاف کے جلسے کے روز ہی ڈی چوک پر جلسہ کرنے کا اعلان کر رکھا ہے جس کے باعث صورت حال کشیدہ ہونے کا خدشہ ہے۔