کراچی: سابق ٹیسٹ کپتان شاہد آفریدی نے کہا ہے کہ بھارتی کرکٹر ویرات کوہلی نے پاکستان آنے کے حوالے سے اچھی بات کی ہے۔
پاکستان کو عالمی ٹی ٹوئنٹی کپ کا فائنل کھیلنا چاہیے، حارث اور صاحبزادہ فرحان کے ساتھ انصاف نہیں کیا گیا، پاکستان کو ایک اچھے اوپنر کی ضرورت ہے، شاہین شاہ آفریدی سے کرکٹ کے معاملات پر بہت کم ہی بات کرتا ہوں۔
معین خان کرکٹ اکیڈمی میں میڈیا سے گفتگو کے دوران شاہد آفریدی نے کہا کہ بھارت کے سابق ٹیسٹ کپتان اور معروف بیٹر ویرات نے پاکستان آکر کرکٹ کھیلنے کے حوالے سے مثبت طرز عمل اپنایا ہے، مجھے ان سے ایسی ہی بات کی امید تھی۔
شاہد آفریدی نے کہا کہ میں ویرات کو خوش آمدید کہتا ہوں، ویرات کوہلی چاہے پی ایس ایل کھیلنے کے لیے پاکستان آئیں یا بھارتی کرکٹ ٹیم کے ساتھ دورہ کریں۔
ایک اور سوال کے جواب میں شاہد خان آفریدی نے کہا کہ صاٸم ایوب کافی با صلاحیت کرکٹر ہے، امید ہے کہ وہ اچھی کارکردگی کا مظاہرہ کرے گا، پاکستان کو ایسا اوپنر چاہیے جو آغاز میں چھ اوورز اچھا کھیلے، سلیکشن کے حوالے سے حارث اور صاحبزادہ فرحان کے ساتھ انصاف نہیں کیا گیا۔
انہوں نے کہا کہ عالمی کپ ٹی ٹوئنٹی کرکٹ ٹورنامنٹ میں امریکا کی وکٹیں بیٹرز کے لیے سازگار ہوں گی، پاکستان کو ورلڈ کپ فاٸنل لازمی کھیلنا چاہیے، تیمور مرزا ٹیپ بال کرکٹ کا اچھا کھلاڑی ہے لیکن وہ پھر بھی شاہد آفریدی نہیں بن سکتا۔
اپنے داماد اور پاکستان کرکٹ ٹیم کے فاسٹ بولر شاہین شاہ آفریدی کے حوالے سے پوچھے گئے سوال پر شاہد آفریدی نے کہا کہ میں کرکٹ پر شاہین سے کم بات کرتا ہوں، شاہین کافی ذہین ہے، میں نے اس کو کہا ہے کرکٹ پر مکمل توجہ مرکوز رکھے۔
