لاہور (خصوصی رپورٹ) پیپلز پارٹی کے صدر آصف زرداری اور پاکستان عوامی تحریک کے سربراہ طاہر القادری ملاقات کریں گے، ملاقات میں سانحہ ماڈل ٹاﺅن کے حوالے سے آئندہ کی حکمت عملی پر بات چیت کی جائے گی۔ تفصیلات کے مطابق آصف علی زرداری اور طاہر القادری کے درمیان ٹیلفونک رابطہ ہوا ہے۔ جس میں دونوں رہنماﺅں نے آج ملاقات پر اتفاق کیا ہے دونوں رہنماﺅں کے درمیان ملاقات سانحہ ماڈل ٹاﺅن اور عوامی تحریک کی اے پی سی کے حوالے سے آئندہ کی حکمت عملی پر بات چیت کی جائے گی۔ ملاقات میں پیپلز پارٹی کا اعلیٰ سطح کا وفد آصف زرداری کے ہمراہ ہو گا جس میں خورشید شاہ، قمر زمان کائرہ اور رحمان ملک بھی شامل ہوں گے۔ دریں اثناءڈاکٹر طاہر القادری نے مرکزی سیکرٹریٹ ماڈل ٹاﺅن میں منہاج القرآن علماءومشائخ کونسل کے اجلاس سے خطاب کرتے ہوئے کہا کہ نواز شریف کی ڈوریں کوئی اور ہلا رہا ہے۔ نجی محفلوں میں پاکستان کے خلاف زہر اگلنے والے نواز شریف اب اعلانیہ بھی دشمن کی بولی بولنے لگے ہیں، عدلیہ آزاد اور آئین کے تابع ہے نوازشریف آج کل کسی اور کے تابع ہے۔ دونوں بھائی عوام کو بے وقوف بنارہے ہیں دونوں ایک پیچ پر ہیں۔ نااہل نوازشریف نے ارادتاً ختم نبوت کے قانون کو ختم کیا، حلف نامہ بدلا وہ اپنے ریلیف کیلئے بیرونی قوتوں کو اپنا سیکولر چہرہ دکھانا چاہتے تھے۔انہوں نے کہا کہ پاکستانی نژاد امریکی فرنٹ مین سعودی عرب میں ملاقاتیں ارینج کروا رہا ہے، شہبازشریف جس پرائیویٹ جہاز میں گئے وہ پاکستان میں رجسٹرڈ نہیں ہے۔
