لاہور (نیوزایجنسیاں) پاکستان کرکٹ بورڈ کے چیئرمین نجم سیٹھی نے نجی چینل کو انٹرویو دیتے ہوئے پی سی بی قانون کو ہاتھ میں لینے والے عمر اکمل کے ساتھ دو دو ہاتھ کرنے کا عندیہ دے دیا۔ ان کا کہنا تھا کہ عمر اکمل نے اپنے معاہدے کی خلاف ورزی کی ہے، نظم و ضبط کی خلاف ورزی برداشت نہیں کی جائے گی۔نجم سیٹھی نے فکسنگ سکینڈل 2010ء کے مرکزی کردار سلمان بٹ پر ہتھ ہولا رکھتے ہوئے کہا کہ ٹیسٹ اوپنر کو غلطی کا احساس ہو گیا ہے تو پاکستان کی دوبارہ نمائندگی ضرور دینی چاہیے۔نو منتخب چیئرمین پی سی بی نے ویمن کرکٹ میں سخت فیصلے کرنے کا اعلان کر دیا۔ ساتھ ہی نجم سیٹھی نے پاکستان کرکٹ میں پرچی سسٹم کا خاتمہ کرتے ہوئے ٹیلنٹ کو سامنے لانے اور خاص طور پر انٹرنیشنل کرکٹ کو ملک میں واپس لانے کے عزم کا اعادہ بھی کیا۔
