لاہور(مانیٹرنگ ڈیسک)چینل فائیو کے پروگرام مرحبا رمضان میں دعا، اس کی فضیلت اور اہمیت پر گفتگو کی گئی۔ علامہ ضیاءاللہ بخاری نے بتایا کہ ارض و سماءکا ستون دعا ہے۔جو اللہ سے ہاتھ اٹھا کر دعا کرتا ہے اللہ اس پر بہت خوش ہوتا ہے۔اللہ تعالیٰ قرآن کریم میں فرماتے ہیں کہ اے میرے بندو میں تمہارے بہت قریب ہوں۔ ماہ رمضان تو اللہ سے دعائیں مانگے کا مہینہ ہے۔نبی کریم نے فرمایا کہ دعا میں اللہ نے اتنی تاثیردی ہے کہ تقدیر، قضاءکو اگر کوئی عمل روک یا ٹال سکتا ہے تو وہ دعا ہے۔نبی کریم نے فرمایا مومن کا سب سے بڑا اسلحہ دعا ہے۔حضرت علیؓ بیان فرماتے ہیں کہ نبی کریم نے ہمیں پیغام دیا کہ ارض و سماءکا نور دعا ہے۔دین کی عمارت دعا کے عمل کی بنیادپر کھڑی ہے۔نبی کریم نے فرمایا کہ دعا نازل شدہ تقدیر کو بھی بدل دیتی ہے۔بیمار انسان دعا سے صحت مند ہو جاتا ہے۔دعا کے عمل سے اللہ بہت سی مصیبتیں اور مشکلات ٹال دیتا ہے۔جو دعا ہم اللہ سے کرتے ہیں اگران میں سے کوئی قبول نہیں ہوتی تو اس کا اجر روز قیامت ملے گا۔اللہ پاک قرآن کریم میں فرماتے ہیں اللہ کی مدد طلب کرو نماز اور صبر کے ساتھ۔ہمیں دعا پورے اخلاص کے ساتھ مانگنی چاہئے دعا کے وقت دل غیر حاضر نہیں ہو نا چاہئے اللہ غافل دل کی دعا قبول نہیں کرتا۔درود شریف پڑھ کر دعا کریں اس کے بغیر دعا قبول نہیں ہوتی دعا سے پہلے درود شریف لازم ہے۔علامہ طاہر محمود بخاری نے بتایا کہ دعا کا لفظی معنی عبادت، سوال کر نا ،مانگنا بھی ہے۔دعا کے ذریعے ہم اللہ کے آگے اپنی محتاجی کو ظاہر کرتے ہیں۔ اگردعا قبول نہ ہو تو گلہ یا شکوہ نہیں کرنا چاہئے بلکہ یہ گمان کرنا چاہئے کہ اس دعا کے قبول نہ ہونے میں ہی بہتری تھی۔حضرت علی ؓکا قول ہے کوشش کئے بغیر دعا حماقت ہے اور کوشش کے بعد دعا نہ کرنا تکبر ہے۔عبادت کے وقت یہ کیفیت ہونی چاہئے کہ ہم اللہ کو دیکھ رہے ہیں یا اللہ ہمیں دیکھ رہا ہے،کوشش کرنی چاہئے دعا خصوع خشوح کے ساتھ مانگیں۔اللہ ہر کسی کی ہر جگہ سنتا ہے اورہماری شہ رگ سے زیادہ قریب ہے اللہ کے سوا کوئی غنی نہیں وہ تمام کائناتوں کا رب یعنی پالنے والا ہے۔ مشہور قوال شیر میانداد نے کہا کہ ہم سب خوش نصیب ہیں کہ ماہ رمضان نصیب ہوا ہمیں چاہئے اس سے بھرپور فائدہ اٹھائیں خوب عبادتیں کریں اللہ کو یاد کریں اور اپنے ساتھ سب کے لئے دعا کریں۔اس موقع پر انہوں نے کلام نصیبا کھول دے میرا ،مدد کر میری اللہ، نصیبا کھول دے میرا میں بندہ عاجز تیرا سنایا۔انہوں نے بتایا اللہ نے مجھے اتنا مقام اور عزت دعاﺅں کے صدقے میں دی۔بچپن سے روزے رکھنے کا شوق تھا پہلا روزہ سکول دور میں رکھا تھا۔شیر میانداد نے نعت رسول مقبول تو کجا من کجا پڑھ کر سنائی۔ان کی خوبصورت آواز نے سماں باندھ دیا۔
