لاہور قلندرز کے تحت ہاکی ٹرائلز آج کراچی میں ہونگے

کراچی : (ویب ڈیسک) پاکستان سپر لیگ فرنچائز لاہور قلندرز کے زیرِ انتظام ہاکی لیگ کیلئے ٹرائلز آج  کراچی ہاکی ایسوسی ایشن کے گراؤنڈ پر ہوں گے۔
قلندرز کی ٹیم کے کپتان شاہین آفریدی کے علاوہ عاقب جاوید، ثمین رانا اور عاطف رانا بھی اس موقع پر موجود ہوں گے۔
شاہین شاہ آفریدی ہاکی کے لیے لاہور قلندر کے برانڈ ایمبیسڈر کے طور پر کام کریں گے ، لاہور قلندرز کے اس اقدام سے ہاکی کے سابق کھلاڑی حنیف خان اور شکیل عباسی نے بھی خوشی کا اظہار کیا ہے ۔
پلیئرز ڈویلپمنٹ پروگرام کے تحت پہلے مرحلے میں کراچی کی ٹیم کے لئے اور پھر لاہور میں ٹرائلز ہونگے۔
یاد رہے کہ گزشتہ روز پاکستان سپر لیگ ( پی ایس ایل ) کی فرنچائز لاہور قلندرز کی جانب سے قومی کھیل ہاکی کی بحالی کیلئے اہم اعلان کیا گیا، قلندرز پلیئر ڈویلپمنٹ ہاکی پروگرام کے تحت سندھ حکومت، پاکستان ہاکی فیڈریشن (پی ایچ ایف) اور لاہور قلندرز کے درمیان معاہدہ طے پا گیا۔
لاہور قلندرز کے کپتان شاہین شاہ آفریدی کا اس حوالے سے کہنا تھا کہ ہاکی ہمارا قومی کھیل ہے، لاہور قلندرز کا پلان بہت زبردست ہے، ہاکی لیجنڈ کے ساتھ مل کر قومی کھیل کی بحالی کے لئے کام کرنے کا خواہشمند ہوں۔