معروف اداکارہ شگفتہ اعجاز نے کراچی کی موجودہ صورتحال پر کھل کر اظہارِ خیال کرتے ہوئے شہر کو ’’گندا‘‘ قرار دے دیا۔
نجی ٹی وی کے ایک پروگرام میں گفتگو کے دوران میزبان کی جانب سے سوال کیا گیا کہ وہ کراچی کو ایک جملے میں کیسے بیان کریں گی۔
اداکارہ نے بغیر کسی ہچکچاہٹ کے صرف ایک لفظ کہا، ’’گندا‘‘۔ ان کے اس مختصر مگر دوٹوک جواب نے پروگرام کے شرکاء کو بھی چونکا دیا۔
بعد ازاں اپنے مؤقف کی وضاحت کرتے ہوئے شگفتہ اعجاز کا کہنا تھا کہ یہ ان کے دل کی آواز ہے کیونکہ کراچی ان کا اپنا شہر ہے اور وہ یہیں رہتی ہیں۔ ان کا کہنا تھا کہ اپنے شہر کی خامیوں کی نشاندہی کرنا برائی نہیں بلکہ بہتری کی جانب پہلا قدم ہے۔
اداکارہ نے حکمرانوں اور متعلقہ اداروں سے اپیل کرتے ہوئے کہا کہ خدا کے لیے کراچی کی سڑکوں کی حالت بہتر بنائی جائے۔ انہوں نے کہا کہ شہر کی ٹوٹی پھوٹی سڑکیں، جگہ جگہ گندگی اور ناقص انفراسٹرکچر نہ صرف عوام کے لیے مشکلات کا باعث ہیں بلکہ یہ صورتحال دیکھ کر شدید غصہ بھی آتا ہے۔
شگفتہ اعجاز نے مزید کہا کہ سڑکوں کی خستہ حالی کے باعث روزمرہ زندگی بری طرح متاثر ہو رہی ہے، جبکہ کسی بھی ہنگامی صورتحال میں شہریوں کو شدید مشکلات کا سامنا کرنا پڑ تا ہے۔ ان کے مطابق فوری اور مؤثر اقدامات کی اشد ضرورت ہے تاکہ شہریوں کو بنیادی سہولیات فراہم کی جا سکیں۔
اداکارہ کے اس بیان کے بعد سوشل میڈیا پر مختلف آراء سامنے آ رہی ہیں، جہاں کچھ صارفین ان کی بات سے اتفاق کر رہے ہیں جبکہ کچھ نے اس انداز کو تنقید کا نشانہ بنایا۔ تاہم یہ معاملہ ایک بار پھر کراچی کے بنیادی مسائل کو اجاگر کرنے کا سبب بن گیا ہے۔
