بالی وڈ اداکارہ پرنیتی چوپڑا کے شوہر راگھو چڈھا نے عام آدمی پارٹی کو خیرباد کہہ کر حکمران جماعت بھارتیہ جنتہ پارٹی (بی جے پی) میں شمولیت اختیار کرلی جس کے بعد سوشل میڈیا پر انہیں سخت تنقید کا سامنا ہے۔
این ڈی ٹی وی کے مطابق راجیہ سبھا کے رکن کی جانب سے بی جے پی میں شامل ہونے کے اعلان کے بعد لوگوں نے انہیں ان فالو کرنا شروع کردیا اور صرف 24 گھنٹے میں ایک ملین سے زائد یعنی 10 لاکھ سے زائد صارفین نے راگھو کو ان فالو کردیا۔
اعداد و شمار کے مطابق اعلان کے دن راگھو کے 14.2 ملین فالوورز تھے جب کہ اب ان کے 12.5 فالوورز ہیں، اس حساب سے وہ تقریباً 17 لاکھ فالوورز سے محروم ہوچکے ہیں۔
دوسری جانب راگھو کے اپنی پارٹی چھوڑنے کے اقدام پراے اے پی ایم ایل اے اور ترجمان سنجیو جھا نے ردعمل دیا اور کہا ‘پارٹی کے رضاکاروں اور حامیوں نے انسٹاگرام پر راگھو کو ان فالو کرنا شروع کردیا ہے کیونکہ اس نے پارٹی کے ساتھ دھوکا کیا ہے، لوگوں نے ان کے اس اقدام کو پسند نہیں کیا’۔
یہاں یہ بات بھی قابلِ ذکر ہے کہ راگھو چڈھا سمیت اے اے پی کے 7 MPs نے بی جے پی میں شمولیت اختیار کی ہے اور سوشل میڈیا پر صارفین راگھو کو ‘غدار’ اور ‘دھوکے باز’ کے القابات دے رہے ہیں۔
