پاکستان کی مقبول اداکارہ و ماڈل آمنہ الیاس نے والد کی وفات کے بعد خود پر گزرنے والے تکلیف دہ لمحات سے پردہ اٹھادیا۔
حال ہی میں آمنہ الیاس نے ایک پوڈ کاسٹ شو میں شرکت کی جہاں انہوں نے اپنی نجی زندگی سے متعلق کئی انکشافات کیے ہیں۔
انہوں نے اپنی والدہ سے متعلق ایک حیران کن انکشاف کرتے ہوئے کہا کہ ’میری امی سمیت میرا پورا ننھیال کیتھولک ہے، میری امی شادی سے پہلے عیسائی تھیں۔ میری امی نے میرے والد سے شادی سے قبل اسلام قبول کرلیا تھا‘۔
اپنے والد کی وفات کے بعد خود پر گزرنے والے مشکل وقت سے متعلق آمنہ الیاس نے کہا کہ ’میرے ابو کی وفات کے بعد میرے ددھیال والوں نے ہم سے تعلق توڑ دیا تھا۔ ایک مسلم فیملی نے ہم سے ہمارا سب کچھ چھین کر ہم سے تعلق ہی توڑدیا تھا‘۔
اداکارہ نے مزید کہا کہ ’ہمارے پاس کچھ بھی باقی نہیں تھا، انہوں نے میرے والد کے کاروبار اور جائیداد پر قبضہ کر لیا تھا‘۔
اپنی والدہ کی کاوشوں کو سرہاتے ہوئے آمنہ الیاس نے کہا کہ ’میری امی نے لیکن بہت محنت کی، چھوٹی چھوٹی نوکری کرکے ہماری پرورش کی اور آج یہ کامیابی ان کی محنت کا نتیجہ ہے‘۔
آمنہ الیاس کا شمار پاکستان کی مقبول اداکارؤں میں ہوتا ہے۔ انہوں نے ڈراموں، فلموں اور فیشن انڈسٹری میں خوب پزیرائی حاصل کی ہے۔
