جے آئی ٹی کی موجودہ کاروائیاںتوہین عدالت, اہم شخصیت کے بیان سے کھلبلی

اسلام آباد (اے پی پی،مانیٹرنگ ڈیسک) وفاقی وزیر مملکت اطلاعات و نشریات مریم اورنگزیب نے کہا ہے کہ جے آئی ٹی کا وجود 10جولائی کو اپنی حتمی رپورٹ پیش کردینے کے بعد فوراًختم ہو گیا،سپریم کورٹ نے جے آئی ٹی کو 7 دن میں دفتر سمیٹنے کی اجازت دی تھی لیکن اس کے باوجود جے آئی ٹی کے کئی کئی گھنٹوں پر مشتمل اب بھی اجلاس ہورہے ہیں،اب بھی بیرونی ایجنسیوں سے اور اداروں سے ٹیلی فونک رابطے کیے جا رہے ہیں اور ریمائنڈر بھیجے جا رہے ہیں، جے آئی ٹی کی اس وقت کی کارروائیاں سپریم کورٹ کی ہدایات کے منا فی ہے، ہم واضح کر رہے ہیں کہ 10جولائی کے بعد ہم والیوم 10میں کسی کاغذ کا اضافہ تسلیم نہیں کریں گے۔ جمعہ کو اپنے بیان میں انہوں نے کہا کہ مختلف ذرائع سے منظر عام پر آنے والی یہ خبریں انتہائی افسوس ناک اور سپریم کورٹ کی ہدایات کے منافی ہیں کہ پانامہ جے آئی ٹی اب بھی اپنی با ضابطہ کارروائیوں میں مصروف ہے۔اس کے کئی کئی گھنٹوں پر مشتمل اجلاس ہو رہے ہیں۔اب بھی بیرونی ایجنسیوں سے اور اداروں سے ٹیلی فونک رابطے کیے جا رہے ہیں اور ریمائنڈر بھیجے جا رہے ہیں۔انہوں نے کہا کہ سپریم کورٹ نے جے آئی ٹی کو صرف اس قدر اجازت دی تھی کہ وہ 7دنوں کے اندر اندر اپنا دفتر سمیٹ لے لیکن دفتر سمیٹنے کی بجائے تمام ارکان اور معاون عملے کے باوجود نہ صرف کھلا ہے بلکہ اس میں مسلسل کام بھی ہو رہا ہے۔جے آئی ٹی کا وجود 10جولائی کو اپنی حتمی رپورٹ پیش کردینے کے بعد فوراًختم ہو گیا لیکن حیرت ہے کہ ان ارکان میں سے کسی نے اپنے محکمے /ادارے میں رپورٹ نہیں کیا۔انہوں نے کہا کہ ہمارے لیے یہ امر انتہائی تشویشناک ہے، ہم واضح کر رہے ہیں کہ 10جولائی کے بعد ہم والیوم 10میں کسی کاغذ کا اضافہ تسلیم نہیں کریں گے۔ انہوں نے کہا کہ اگر جے آئی ٹی کام ختم نہیں کر سکی تھی تو اسے سپریم کورٹ سے باضابطہ توسیع مانگنی چاہیے تھی۔دفتر ”وائنڈ اپ “کی اجازت لے کر جے آئی ٹی کے طور پر اپنا کام جاری رکھنا سپریم کورٹ کی بھی توہین ہے۔