اسلام آباد (ویب ڈیسک) حکومت نے ایون فیلڈ اپارٹمنٹس کی قرقی کیلئے برطانیہ کی عدالت سے رجوع کرنے اور پیسہ پاکستان لانے کا فیصلہ کر لیا ہے۔وزیراعظم عمران خان کی زیر صدارت وفاقی کابینہ کے اجلاس میں کئی بڑے فیصلے کئے گئے جن میں ایون فیلڈ پراپرٹیز کا پیسہ وطن واپس لانے کا فیصلہ بھی شامل ہے۔ وفاقی وزیر اطلاعات فواد چوہدری نے اجلاس کے بعد پریس کانفرنس میں کہا کہ ایون فیلڈ پراپرٹیز پاکستان کے عوام کی ملکیت ہیں اور آج کابینہ نے وزارت قانون کو ہدایت دی ہے کہ ان جائیدادوں کی قرقی کیلئے برطانیہ کی عدالت سے رجوع کریں اور ان کا پیسہ پاکستان لایا جائے۔انہوں نے کہا کہ اس حوالے سے نیب کے وکیل شہزاد کبر کی زیر صدارت ٹاسک فورس قائم کر دی گئی ہے اور اس کا نوٹیفکیشن بھی جاری ہو چکا ہے۔ اس ٹاسک فورس میں ایف آئی اے، نیب، سٹیٹ بینک، ایس ای سی پی، ایف بی آر، وزارت قانون اور وزارت خارجہ کے نمائندے شامل ہوں گے۔

اسلام آباد(ویب ڈیسک) وزیر خزانہ اسد عمر نے کہا ہے کہ وزیراعظم نے منی لانڈرنگ کے ذریعے بھیجا گیا پیسہ واپس لانے کا حکم دیا ہے۔میڈیا رپورٹس کے مطابق وزیر خزانہ اسد عمر نے نیوز کانفرنس کرتے ہوئے کہا کہ سوئس بینکوں میں کتنی رقم پڑی ہے کوئی علم نہیں، اسحاق ڈار نے چار سال پہلے بتایا تھا 200 ارب ڈالرز پڑے ہیں، دبئی میں پاکستانیوں کی 8 ارب ڈالرز کی جائیدادیں ہیں، وزیراعظم نے منی لانڈرنگ کے ذریعے بھیجا گیا پیسہ واپس لانے کا حکم دیا ہے، حکومت کی پہلی ترجیح بیرون ملک سے پیسہ واپس لانا ہے۔وزیرخزانہ کا کہنا تھاکہ ملازمین کی وجہ سے پی آئی آئی اے اوراسٹیل ملز تباہ نہیں ہوئی، پی آئی اے اور اسٹیل ملز سے کسی کوبے روزگار نہیں کررہے جب کہ وزیراعظم ہاو¿س میں 500 ملازمین ذاتی نوکری پر مامور تھے، اب یہ ملازمین عوام کی خدمات پرمامور ہوں گے، اوورسیز پاکستانیوں کے لیے بانڈز جاری کرنے کا فیصلہ ابھی نہیں ہوا، یہ پہلے سے طے ہوچکا ہے کہ اوورسیزپاکستانیوں کے لیے بانڈزجاری کریں گے، چند روز میں بانڈز کی حتمی منظوری دے دی جائے گی۔

لاہور(ویب ڈیسک) پنجاب اسمبلی کے اجلاس میں وزیر اعلیٰ منتخب ہونے کے بعد عثمان بزدار نے اپنے عہدے کا حلف اٹھا لیا ,قائم مقام گورنر پنجاب چوہدری پرویز الہی نے ان سے حلف لیا۔میڈیا رپورٹس کے مطابق نومنتخب وزیراعلیٰ پنجاب سردار عثمان بزدار نے اپنے عہدے کا حلف اٹھا لیا ہے، اس موقع پر قائم مقام گورنر چوہدری پرویز الہی، نگراں وزیراعلی حسن عسکری اور رکن پنجاب اسمبلی علیم خان سمیت متعدد اراکین اسمبلی بھی گورنر ہاو¿س موجود تھے۔میڈیا سے مختصر بات کرتے ہوئے وزیر اعلیٰ عثمان بزدار نے کہا کہ قوم کا پیسہ قوم پر خرچ ہو گا، سرکاری وسائل کو امانت سمجھ کر دیانت داری سے خرچ کریں گے۔اس سے قبل عثمان بزدار اپنے عہدے کا حلف لینے کے لیے سرکاری گاڑی کے بجائے ذاتی گاڑی میں گورنرہاو¿س پہنچے۔واضح رہے عثمان بزدار پاکستان تحریک انصاف کی جانب سے وزارت اعلی کے منصب کے لیے نامزد کیے گئے اور 186 ووٹ حاصل کر کے وزیراعلی منتخب ہوگئے، ان کے مدمقابل پاکستان مسلم لیگ نون کے رہنما حمزہ شہباز نے 159 ووٹ حاصل کیے تھے،وزارت اعلیٰ کے لیے ہونے والے انتخاب میں پاکستان پیپلزپارٹی نے کسی امیدوار کو ووٹ نہیں دیا، اس سے قبل وزارت عظمی کے انتخابات کے دوران بھی پیپلزپارٹی غیرجانبدار رہی تھی۔

اسلام آباد(ویب ڈیسک)اسلام آباد ہائیکورٹ نے سابق وزیراعظم نواز شریف، ان کی صاحبزادی مریم نواز اور داماد کیپٹن (ر) محمد صفدر کی سزا کے خلاف اپیلوں پر فیصلہ محفوظ کرلیا۔اسلام آباد ہائیکورٹ کے جسٹس اطہر من اللہ اور جسٹس میاں گل حسن اورنگزیب پر مشتمل 2 رکنی بینچ نے شریف فیملی کی سزا کے خلاف دائر اپیلوں پر سماعت کی۔آج کی سماعت کے دوران ڈپٹی پراسیکیوٹر نیب سردار مظفر عباسی نے اپنے دلائل مکمل کیے جس کے بعد عدالت نے درخواستوں پر فیصلہ محفوظ کیا۔دوران سماعت نیب نے مو¿قف اپنایا کہ سپریم کورٹ کے حکم پر شریف خاندان کے خلاف ریفرنس دائر کیے اور عدالت عظمیٰ کے حکم پر مشترکہ تحقیقاتی ٹیم بنائی گئی۔نیب پراسیکیوٹر سردار مظفر عباسی نے کہا کہ لندن فلیٹس نیلسن اور نیسکول کے نام پر تھے، ہم نے دستاویزات سے ثابت کردیا کہ ان کمپنیوں کے مالک نواز شریف ہیں اور یہ فلیٹس انہی کی ملکیت میں ہیں جب کہ ان فلیٹس کی ملکیت ثابت کرنا نواز شریف کا ہی کام ہے۔نیب نے عدالت سے استدعا کی کہ نواز شریف اور دیگر ملزمان کو جیل میں ہی رکھا جائے اور سزا معطل کرنے کی درخواست خارج کی جائے جس پر جسٹس اطہر من اللہ نے کہا کہ ابھی کوئی فیصلہ فریقین کو متاثر کرسکتا ہے، عام تعطیلات کے بعد یہ درخواستیں اپیل کے ساتھ سن لیتے ہیں۔جسٹس اطہر من اللہ نے نواز شریف کے وکیل خواجہ حارث سے مکالمے کے دوران کہا کہ آپ کو وہ مشورہ دیں گے جو آپ کے حق میں ہو، فیصلہ لکھتے ہوئے ہم نے وجوہات لکھنی ہیں، آپ کے فائدے میں ہے ان درخواستوں کو زیر التوائ رہنے دیں۔اس موقع پر نواز شریف کے وکیل خواجہ حارث نے کہا کہ ‘میرا نہیں خیال میرے دلائل حد سے بڑھے ہوئے ہیں، میرا بہت سادہ سوال ہے، آج میں یہ کہتا ہوں کہ یہ میرا اثاثہ ہے، اب قانون کی پوزیشن بہت سمپل ہے’۔جسٹس اطہر من اللہ نے ریمارکس دیے کہ نیب کے قانون کے مطابق مقدمات فکس کرنے کے بعد فیصلہ دینا ہے، ہم سزا معطلی کی درخواستوں پر مناسب فیصلہ سنائیں گے۔بینچ میں شامل دونوں ججز نے مشاورت کی جس کے بعد عدالت نے سابق وزیراعظم نواز شریف، مریم نواز اور کیپٹن (ر) محمد صفدر کی سزا کے خلاف اپیلوں پر فیصلہ محفوظ کرلیا۔