ن لیگ کے پاﺅں اکھڑ چکے ہیں : میاں حبیب، چیئرمین نادرا نے پوزیشن کا غلط فائدہ اٹھایا : علی جاوید نقوی ، نثار کے پاس کچھ نہیں، وقت گزار رہے ہیں : ضمیر آفاقی، نواز نہ آئے تو سیاسی نقصان ہو گا : امجد اقبال ، چینل ۵ کے پروگرام ” کالم نگار “ میں گفتگو

لاہور (مانیٹرنگ ڈیسک) کالم نگار میاں حبیب نے کہا ہے کہ تحریک انصاف نے نادرا کی جانب سے مسلم لیگ ن کو ووٹرز کا ڈیٹا فراہم کرنے پر تحفظات کا اظہار کیا ہے۔ چینل ۵ کے پروگرام کالم نگار میں گفتگو کرتے ہوئے انہوں نے کہا پاکستان میں ہر ادارے میں سیاست ملوث ہے۔ شاید اس وجہ سے تحریک انصاف کو تحفظات ہیں۔ مسلم لیگ ن نے سیاسی بھرتیاں کی ہیں اور ہر ادارے میں ان کے لوگ موجود ہیں۔ بنیادی طور پر تحریک انصاف کو کچھ شواہد ملے ہیں میرے خیال میں تمام سیاسی جماعتوں کے خدشات دور ہونے چاہئیں۔ انہوں نے کہا اگر نوازشریف کو سزا ہوتی ہے تو لازمی طور پر ان کے بچوں کو بھی سزا ہو گی اگر نوازشریف کو سزا ہوئی تو کرپشن ثابت ہو جائے گی۔ سیاسی میدان میں ن لیگ کے پیر اکھڑ چکے ہیں۔ چودھری نثار کو شہبازشریف نے لارا لگا کر رکھا تھا سیاست میں چودھری نثار کا کردار بہت اہم ہے۔ کالم نگار ضمیر آفاقی نے کہا اتنا بڑا ایشو نہیں جو بنایا جا رہا ہے شاید تحریک انصاف کو خدشہ ہے وہ الیکشن ہار نہ جائیں اس لیے اس قسم کی باتیں ہو رہی ہیں۔ ڈیٹا فراہم کرنے سے کچھ فرق نہیں پڑتا۔ تحریک انصاف نے جو ٹکٹیں تقسیم کی ہیں اس کا ردعمل اب بھی ہے۔ نوازشریف واپس آ رہے تھے لیکن اچانک کلثوم نواز کی حالت خراب ہو گئی۔ نوازشریف کو سزا ہوئی تو ان کا ووٹ بنک اور بڑھ جائے گا۔ چودھری نثار کے پاس کچھ بھی نہیں وہ وقت گزار رہے ہیں۔ کالم نگار جاوید نقوی نے کہا چیئرمین نادرا نے اپنی پوزیشن کا غلط استعمال کیا۔ ڈیٹا فراہم کرنے کا مطلب ہے اس کے ذریعے ووٹر تک رسائی حاصل کی جا سکتی ہے۔ یہ ایک قسم کی تکنیکی دھاندلی ہے۔ بیوروکریسی نگران حکومت کی بات نہیں سن رہی۔ موجودہ سیاسی نظام کوئی دودھ کا دھلا نہیں اگر مریم نواز واپس نہیں آتیں تو ان کی سیاسی مہم متاثر ہوگی۔ انہوں نے کہا چودھری نثار اب بھی بڑی شخصیت ہیں۔ چودھری نثار آزاد حیثیت میں جیت جائیں گے۔ سینئر صحافی امجد اقبال نے کہا الیکشن میں ڈیڑھ ماہ باقی ہے اگر ایسے ہی ہوتا رہا تو کام کس طرح چلے گا۔ میرے خیال میں تمام سیاسی جماعتوں کو سنجیدگی کا مظاہرہ کرنا ہو گا تاکہ الیکشن کا انعقاد وقت پر ممکن ہو سکے۔ انہوں نے کہا کہ نوازشریف کے بچوں کا کیس الگ کر دیا گیا ہے اگر نوازشریف نہیں آتے تو ان کو اس کا سیاسی نقصان بھی ہوگا۔