لاہور(شوبزڈیسک)گلوکار عاطف اسلم کے دو گیتوں نے بھارتی نئی رومانوی فلم ” لیلیٰ مجنوں “ میں چار چاند لگا دئیے ۔عشق و محبت کی لازوال داستان کے جدید ورژن پر مبنی فلم 7 ستمبر کو پاکستانی سنیماﺅں کی زینت بنے گی ۔ ڈائریکٹر امتیاز علی کی پیشکش ” لیلیٰ مجنوں “ ریلیز سے قبل ہی فلم بینوں کی توجہ کا مرکز بن گئی ہے جس کی وجہ لیڈ کاسٹ اویناش تیواری اور ترپتی دمری پر کشمیر کی حسین وادیوں میں فلمائے گئے فلم کے سریلے گیت ہیں ۔فلم کا ٹائٹل ٹریک ” او میری لیلیٰ“ عاطف اسلم کی جادوئی آواز میں ریکارڈ کیا گیا ہے جو تیزی سے میوزک چارٹس پر اوپر جا رہا ہے ۔ عاطف اسلم نے فلم کے ایک اور گیت ” تم“ کو اپنی آواز دی ہے جو فلم کے موضوع کی طرح رومانوی جذبات کی بھرپور عکاسی کرتا ہے ۔ بالاجی ٹیلی فلمز اور امتیاز علی کے اشتراک سے بنائی گئی ” لیلی مجنوں “ کی ہدایات ساجد علی نے دی ہیں جبکہ فلم کا میوزک نیلادری کمار اور جوئی برووا نے مل کی ترتیب دیا ہے ۔ فلم میں عصر حاضر کے نامور گلوکاروں اریجیت سنگھ، موہت چوہان ، جاوید علی ،شریا گھوشال ، سنیدھی چوہان اور بابل سپریوسمیت دیگر نے بھی اپنی آوازوں کا جادوجگایا ہے جس کے باعث ”لیلی مجنوں “ کا البم مکمل رومانوی پیکج کی صورت میں سامنے آیا ہے ۔لیلی مجنوں ڈسٹری بیوشن کلب کے زیر اہتمام رواں جمعے سنیماﺅں کی زینت بنے گی۔
