اسلام آباد: (ویب ڈیسک) جویریہ ظفر کے زیر صدارت قومی اسمبلی کی قائمہ کمیٹی برائے اطلاعات و نشریات کا اجلاس ہوا، جس میں کمیٹی نے صحافی ارشد شریف قتل کے حوالے سے تفصیلی بریفنگ طلب کر لی۔
اجلاس کے دوران جویریہ ظفر نے کہا کہ ابھی تک ارشد شریف قتل کے حوالے سے کمیٹی کو کوئی بریفنگ نہیں دی گئی، آئندہ اجلاس میں صحافیوں کے تحفظ کے حوالے سے بل پر بھی غور کیا جائے گا، کمیٹی نے اسلام آباد ہائیکورٹ میں صحافیوں پر تشدد کی مذمت کی اور کہا کہ پولیس کی جانب سے صحافیوں کو ذمہ داریوں کی ادائیگی سے روکا گیا۔
اس موقع پر وزیر اطلاعات مریم اورنگزیب نے کہا کہ صحافیوں پر تشدد کے معاملے پر وزارت داخلہ کے ساتھ میٹنگ ہوئی ہے، اسلام آباد ہائیکورٹ جانے سے صحافیوں کو روکا گیا، صحافیوں پر تشدد کے واقعہ کی رپورٹ وزیر داخلہ نے طلب کر لی ہے۔
اجلاس میں ناز بلوچ نے کہا کہ صحافیوں کے حوالے سے قانون سازی ہونی چاہئے تاکہ صحافی خود کو غیر محفوظ تصور نہ کریں، خواتین صحافیوں کے خلاف بھی مہم چلائی جاتی ہے، اس پر بھی بات ہونی چاہئے۔
ڈراموں اور ٹی وی اشتہارات میں معاشرتی اقدار کے منافی مواد پر اراکین کمیٹی نے تشویش کا اظہار کیا جس پر سیکرٹری اطلاعات نے کہا کہ ہر صوبے میں کونسل آف کمپلینٹ ہے، شکایت آئے تو کونسل آف کمپلینٹ سننے کی مجاز ہے، ڈرامے سنسر کرنے کا کوئی بورڈ موجود نہیں صرف فلم سنسر بورڈ ہے۔
سیکرٹری اطلاعات نے کہا کہ 1972ء سے فلم کو سنسر کرنے کی فیس 250 ہے، اس کو بڑھا کر ایک ہزار روپے کیا جا رہا ہے، ڈراموں کو سنسر کرنے کے حوالےسے اگر حکومت قانون سازی کرنا چاہے تو کر سکتی ہے۔
جویریہ ظفر نے کہا کہ ڈرامہ کے آن ایئر آنے سے پہلے ڈرامے کے مواد کو دیکھا جانا چاہئے، جس پر مریم اورنگزیب نے کہا کہ ڈراموں کو سنسر کرنے کے حوالے سے قانون سازی کی جائے گی۔
چیئرمین پیمرا سلیم بیگ نے کمیٹی کو بتایا کہ 27 اشتہارات جو معاشرتی اقدار کے خلاف تھے ان پر پابندی عائد کی گئی ہے، میڈیا ہاؤسز کو عدالتوں سے حکم امتناع مل جاتا ہے۔

لاہور: (ویب ڈیسک) نیشنل اکاؤنٹبیلٹی بیورو (نیب) کے دو اہم ڈائریکٹر جنرلز کا تبادلہ کر دیا گیا۔
نیب ہیڈ کوارٹرز نے دونوں افسروں کے تبادلے کا نوٹیفکیشن جاری کر دیا، نوٹیفکیشن کے مطابق ڈی جی نیب ملتان فیاض قریشی کو ڈی جی نیب سکھر تعینات کر دیا گیا۔
ڈائریکٹر جنرل نیب سکھر مسعود عالم خان کو ڈی جی نیب ملتان تعینات کر دیا گیا ہے۔

کراچی: (ویب ڈیسک) پاکستان تحریک انصاف کے رہنما علی زیدی نے کہا ہے کہ شہباز سپیڈ نے راکٹ کی سپیڈ سے معیشت کا بیڑہ غرق کر دیا ہے۔
کراچی میں پریس کانفرنس کرتے ہوئے علی زیدی نے کہا کہ پاکستان میں معاشی تباہی ہو رہی ہے، ہم نے اسمبلی میں استعفیٰ دیا تو کہا گیا سامنے آکر دیں، ہم نے استعفے اس لیے دیئے تھے تاکہ ملک میں الیکشن ہوں، آج پاکستان کی معیشت کیلئے سیاہ دن ہے، رجیم چینج کے بعد پاکستان میں معاشی تباہی جاری ہے، شوکت ترین نے جنرل (ر) باجوہ کو سمجھایا تھا عدم استحکام ہوا تو معیشت سنبھالی نہیں جائے گی۔
سابق وفاقی وزیر علی زیدی نے کہا کہ اس وقت سب کو شہباز شریف کی راکٹ سپیڈ چڑھی ہوئی تھی، اچھی خاصی معیشت چل رہی تھی ان کے اڑتے تیر نے بیڑہ غرق کر دیا، الیکشن میں پی ڈی ایم کا انتخابی نشان ’اڑتا تیر‘ ہوگا، عبدالقادر پٹیل نے ایک کروڑ روپے بیرون ملک دوروں پر خرچ کیے، جونیئر زرداری دنیا میں گھومنے کی ہاف سنچری مکمل کر چکے ہیں۔
علی زیدی نے مزید کہا کہ بلاول نے صرف امریکا کے 11 دورے کیے ہیں، بلاول زرداری ڈھائی ارب روپے بیرون ملک دوروں پر خرچ کر چکے ہیں، بلاول بتائیں بیرون ملک دوروں پر کیسے خرچہ کیا؟، بلاول زرداری ورلڈ ٹور پر نکلے ہوئے ہیں، یہ پلان کے مطابق پاکستان کو ڈیفالٹ کرانا چاہتے ہیں، پھر یہ کہیں گے ہمارے پاس الیکشن کرانے کے پیسے نہیں۔

اسلام آباد: (ویب ڈیسک) آرمی چیف جنرل سید عاصم منیر وزیر اعظم ہاؤس پہنچے جہاں انہوں نے وزیر اعظم شہباز شریف سے ملاقات کی۔
ذرائع کے مطابق ملاقات میں افواج پاکستان کے پیشہ وارانہ امور پر تبادلہ خیال کیا، قومی سلامتی کے امور پر بھی اظہار خیال کیا گیا اس کے علاوہ دونوں سربراہوں نے خطے کی مجموعی سکیورٹی کی صورتحال پر بھی گفتگو کی۔
واضح رہے پنجاب اور خیبرپختونخوا میں انتخابات کرانے کے حوالے سے سپریم کورٹ کا فیصلہ آنے کے بعد دونوں سربراہوں کی ملاقات بہت اہمیت کی حامل ہے، قوی امکان ہے کہ مستقبل کے حوالے سے اس ملاقات میں کوئی فیصلہ کیا جائے۔

اسلام آباد: (ویب ڈیسک) وزیر خزانہ اسحاق ڈار نے کہا ہے کہ پاکستان مخالف عناصر ملک کے ڈیفالٹ ہونے سے متعلق افواہیں پھیلا رہے ہیں۔
سماجی رابطے کی ویب سائٹ پر اپنے بیان میں وفاقی وزیر خزانہ نے کہا کہ پاکستان کے ڈیفالٹ ہونے سے متعلق افواہیں سراسر غلط ہیں، سٹیٹ بینک کے پاس زرمبادلہ کے ذخائر بڑھ رہے ہیں، بیرونی ادائیگیوں کے باوجود ذخائر 4 ہفتوں میں پہلے کے مقابلے میں ایک بلین ڈالر زیادہ ہیں۔
انہوں نے مزید کہا غیر ملکی کمرشل بینکوں نے پاکستان کو سہولیات فراہم کرنا شروع کر دی ہیں، آئی ایم ایف کے ساتھ ہمارے مذاکرات مکمل ہونے والے ہیں، امید ہے اگلے ہفتے تک آئی ایم ایف کے ساتھ معاہدے پر دستخط ہو جائیں گے، تمام اقتصادی اشاریے آہستہ آہستہ درست سمت میں بڑھ رہے ہیں۔

اسلام آباد: (ویب ڈیسک) الیکشن کمیشن نے خیبرپختونخوا و پنجاب کے انتخابات کرانے کا فیصلہ کرتے ہوئے انتخابی شیڈول 54 دن کا رکھنے پر اتفاق کیا ہے۔
چیف الیکشن کمشنر کی زیر صدارت الیکشن کمیشن کا اجلاس ہوا جس میں خیبرپختونخواہ اور پنجاب میں انتخابات سے متعلق سپریم کورٹ کے فیصلے پر غور کیا گیا۔
الیکشن کمیشن نے خیبرپختونخوا و پنجاب کے انتخابات سپریم کورٹ کے حکم کی روشنی میں کرانے کا فیصلہ کیا، اجلاس میں دونوں صوبوں کی مجوزہ تاریخوں پر مشاورت کی گئی۔
ذرائع کے مطابق الیکشن کمیشن نے انتخابی شیڈول 54 دن کا رکھنے پر اتفاق کیا، انتخابی تاریخوں کی تجویز میں رمضان اور عید کو بھی مدنظر رکھا جائے گا۔
انتخابی تاریخوں پر سٹیک ہولڈرز سے حتمی مشاورت ہو گی، صدر اور گورنر نے مشاورت کی تو الیکشن کمیشن اس میں شریک ہوگا۔

گوجرانوالہ: (ویب ڈیسک) جوڈیشل مجسٹریٹ محمد امتیاز باجوہ نے جیل بھرو تحریک کے دوران گرفتار پی ٹی آئی کے 12 کارکنوں کی درخواست ضمانت منظور کر لی۔
عدالت نے پی ٹی آئی کارکنوں کو ایک لاکھ کے مچلکوں پر جیل سے رہا کرنے کا حکم دیا ہے۔
رہائی پانے والے کارکنوں میں سعید احمد ملہی، شمش پرویز، عمران عباس، عمیر، محمد زمان شامل ہیں، فاضل خان، عون عباس، فرحان ظفر، اعجاز احمد، محمد عمران اور علی حسن بھی رہائی پانے والوں کی فہرست میں شامل ہیں۔
گرفتار کارکنوں کے خلاف سب انسپکٹر امجد ناصر کی مدعیت میں 16 ایم پی او کے تحت مقدمہ درج کیا گیا تھا، مقدمہ تھانہ سیٹلائٹ ٹاؤن میں درج کیا گیا تھا، تمام 12 پی ٹی آئی کارکنوں نے جیل بھرو تحریک کے تحت گرفتاری دی تھی۔