لاہور: (ویب ڈیسک) رہنما تحریک انصاف اور سابق وفاقی وزیر اطلاعات و نشریات فواد چودھری نے کہا ہے کہ سپریم کورٹ کے چیف جسٹس اور سینئر ترین جج صاحبان کو دھمکیاں ناقابل قبول ہے۔
سماجی رابطے کی ویب سائٹ ٹوئٹر پر اپنے پیغام میں فواد چودھری نے لکھا کہ پوری قوم سپریم کورٹ کے ساتھ کھڑی ہے، اس اقدام کی شدید مذمت کرتے ہیں، اس معاملے پر آج غور کریں گے۔
انہوں نے کہا کہ آج پاکستان دنیا میں تنہا ہے، قریب ترین دوست ممالک اس لئے حکومت کو مدد دینے سے گریزاں ہیں کہ موجودہ سیٹ اپ پاکستان کے عوام کو منظور نہیں۔
سابق وزیر کا مزید کہنا تھا کہ اسٹیبلشمنٹ کی کوششوں کے باوجود دوست ممالک سمجھتے ہیں موجودہ حکومت کے ساتھ کھڑا ہونا پاکستان کے عوام کے خلاف کھڑا ہونا ہے اور وہ عوام کے ساتھ ہیں۔

اسلام آباد: (ویب ڈیسک) پاکستان میں دہشتگردی کا نیٹ ورک چلانے والے بھارتی جاسوس کلبھوشن یادیو کی گرفتاری کو 7 سال مکمل ہوگئے۔
کلبھوشن سدھیر یادیو حسین مبارک پٹیل کے نام سے پاکستان میں دہشتگردی کا نیٹ ورک چلا رہا تھا ، کلبھوشن کو پاکستانی ایجنسیوں نے 3 مارچ 2016 کو چمن کے علاقے ماشخیل سے گرفتار کیا تھا۔
کلبھوشن یادیو بھارتی نیوی کا کمانڈر رینک کا حاضر سروس آفیسر تھا ، 53 سالہ جاسوس کلبھوشن یادیو 2003 سے بھارتی ایجنسی ”را“ کے لئے پاکستان میں منظم دہشت گردانہ کاروائیوں میں ملوث تھا، کلبوشن 2003 میں ایران کی بندرگاہ ’ چاہ بہار‘ میں جعلی پاسپورٹ پر داخل ہوا اور اسکریپ کے کاروبار کی آڑ میں بلوچ علیحدگی پسندوں کا نیٹ ورک منظم کیا۔
پاکستانی ایجنسیوں نے 9 سال کی کوششوں کے بعد کلبھوشن کو ٹریپ کیا، کلبھوشن نے اپنے بیان میں پاکستان میں دہشتگردی کا اعتراف کیا، کلبھوشن نے تسلیم کیا کہ بھارت کا ہدف سی پیک، گوادر بندرگاہ اور بلوچستان میں علیحدگی پسند تحریک کو بڑھاوا دینا تھا۔
ستمبر 2016میں پاکستان نے کلبھوشن یادیو اور ”را“ کی پاکستان میں دہشت گردانہ کاروائیوں پر مبنی ڈوزیئر بھی اقوامِ متحدہ کے حوالے کیا تھا، بھارت نے کلبھوشن یادیو کواپنا شہری ماننے سے انکار کردیا تھا تاہم اپریل 2017 میں پاکستان کی طرف سے کلبھوشن کو سزائے موت سنائے جانے کے بعد بھارت میں کھلبلی مچ گئی تھی۔
بھارت کلبھوشن یادیو کی رہائی کے لیے عالمی عدالت پہنچا تاہم عالمی عدالت انصاف نے پاکستان میں دہشت گردی کی کارروائیوں میں ملوث کلبھوشن یادیو کی بریت اور بھارت کے حوالے کرنے سے متعلق درخواست کو مسترد کردیا تھا۔
اعلیٰ عہدے کے حاضر سروس انٹیلی جنس افیسر کا پاکستان میں گرفتار ہو جانا ”را“ کا پاکستان میں انتشار اور دہشتگردی پھیلانے کا ثبوت ہے، ماضی میں بھی سری لنکا، نیپال اور میانمار بھی بھارت پر دہشتگری کا الزام لگاچکے ہیں ۔
11جنوری 2023 کو میانمار نے بھارت میں موجود دہشتگردوں کے ٹریننگ کیمپ پر سٹرائیک بھی کی تھی ، کیا عالمی برادری بھارت کے ہمسایوں کی طرف سے اس کے خلاف دہشتگری کی شکایات پر کوئی ایکشن لیں گی؟ ۔کیا ہندوتوا نظریہ کے تحت پنپتا ہندوستان دہشتگری کے ذریعے خطے میں انتشار پھیلا کر عالمی امن کے لئے خطرہ نہیں بن رہا۔

کوئٹہ : (ویب ڈیسک) صوبائی دارالحکومت کوئٹہ اور گردونواح میں رات سے وقفے وقفے سے بارش کاسلسہ جاری ہے ، مختلف علاقوں میں بارش کے بعد جاتی سردی ایک بار پھر لوٹ آئی ہے۔
صوبائی دارالحکومت کوئٹہ، زیارت، پشین، سمیت بلوچستان کے مختلف علاقوں میں رات سے وقفے وقفے سے بارش کا سلسلہ جاری ہے ، بارکھان ، خضدار، ژوب، سبی، لورالائی، زیارت اور قلات میں بھی بادل کھل کر برسے ، بارکھان میں 14، خضدار، 11، قلات 10، ژوب 8، سبی 5، چمن 4 ، کوئٹہ اور دالبندین 3 ملی میٹر بارش ریکارڈ کی گئی ۔
گلگت بلتستان کے ضلع استور میں چار روز کے دوران چار فٹ تک برف پڑچکی ہے، رابطہ سڑکیں بند ہیں اور لوگ گھروں میں محصور ہوگئے ہیں۔
ضلع دیامر میں بھی شدید برف باری کے بعد درجہ حرارت نقطہ انجماد سے نیچے گر گیا ہے، گزشتہ روز بھی ژوب، زیارت، چمن، سبی اور خضدار سمیت صوبے کے 13 اضلاع میں تیز ہواؤں اور گرج چمک کے ساتھ بارش ہوئی تھی۔
محکمۂ موسمیات نے آئندہ 24 گھنٹوں کے دوران صوبے کے شمالی، مغربی اور وسطی اضلاع میں مزید بارش کی پیش گوئی کی ہے ۔

راولپنڈی : (ویب ڈیسک) سربراہ عوامی مسلم لیگ شیخ رشید کا کہنا ہے کہ پی ڈی ایم میں پھوٹ پڑچکی ہے، 2بڑوں کی میٹنگ الیکشن کرائے گی۔
سربراہ عوامی مسلم لیگ و سابق وزیرداخلہ شیخ رشید نے سماجی رابطے کی ویب سائٹ ٹوئٹر پر ایک بیان میں کہا ہے کہ آج سپریم کورٹ میں 1کروڑ اوورسیز پاکستانی ووٹوں کی سماعت ہوگی، عمران خان کی نااہلی یا گرفتاری جلتی پر پٹرول کا کام کرے گی۔
انہوں نے کہا کہ چین نے دوستی کا حق ادا کردیا ہے، پٹرول اور بجلی کی قیمتیں بھی بڑھنے جارہی ہیں ، نہ ڈالر دستیاب نہ فنڈنگ موجود ہے، سیاست بچانی ہے یا ریاست ، ڈالر شرح سود پٹرول مہنگائی سب ریکارڈ ٹوٹ گئے ہیں ۔
شیخ رشید نے مزید کہا کہ الیکشن کمیشن نے عام انتخابات کی تیاریاں شروع کردی ہیں، جو بھی عدالت کے فیصلے کی تضحیک کرے گا اسے عدالت کے کٹہرے میں کھڑا ہونا پڑے گا۔
سابق وزیرداخلہ نے موجودہ حکومت پر تنقید کرتے ہوئے مزید کہا کہ آئی ایم ایف کے اسٹاف لیول فیصلے سے پہلے غریب پر مہنگائی کی مزید بجلی گرے گی، غریب ذبح خانے میں حکمران مہ خانے میں بیٹھے ہیں۔

لندن : (ویب ڈیسک) پاکستان مسلم لیگ (ن) کے سربراہ اور سابق وزیراعظم نواز شریف نے کہا ہے کہ اگر مجھے پاکستان تحریک انصاف ( پی ٹی آئی ) کے چیئرمین عمران خان کی طرح انصاف فراہم کیا جاتا تو پاکستان ترقی کر رہا ہوتا۔
برطانیہ کے دارالحکومت لندن میں ایون فیلڈ ہاؤس کے باہر ایک صحافی نے سربراہ مسلم لیگ ( ن) سے سوال کیا کہ جس طرح عمران خان کو عدالت سے انصاف مل رہا ہے، اگر 2017 میں اس کا آدھا بھی آپ کو مل جاتا تو کیا ہوتا؟۔
غیر رسمی گفتگو میں صحافی کے سوال کا جواب دیتے ہوئے سابق وزیر اعظم نے کہا کہ ’’ پاکستان ہوا میں اڑ رہا ہوتا ‘‘ ، اپنے بیان کی وضاحت کرتے ہوئے نواز شریف نے کہا کہ اس کا مطلب یہ ہے کہ اگر عمران خان جیسا انصاف مجھے ملتا تو ملک خوشحال ہوتا اور ترقی کرتا۔
یاد رہے کہ گزشتہ روز مسلم لیگ ( ن ) کی سینئر نائب صدر اور چیف آرگنائزر مریم نواز نے بھی پی ٹی آئی چیئرمین کو تنقید کا نشانہ بنایا تھا۔
سماجی رابطے کی ویب سائٹ ٹوئٹر پر عمران خان کے ایک ٹوئٹ پر رد عمل دیتے ہوئے مریم نواز نے کہا تھا کہ بے رحمانہ لوٹ مار، نااہلی، غلط ترجیحات، ظالمانہ ڈیل جو آپ نے انٹرنیشنل مانیٹری فنڈ ( آئی ایم ایف ) کے ساتھ کی اور پھر اس کی خلاف ورزی نے ملک کو معاشی بدحالی میں ڈالا، ہم اس کو ختم کر رہے ہیں۔

اسلام آباد: (ویب ڈیسک) وزیر مملکت برائے پیٹرولیم ڈاکٹر مصدق ملک نے کہا ہے کہ پاکستان تحریک انصاف ( پی ٹی آئی ) کی سابق حکومت نے انٹرنیشنل مانیٹری فنڈ ( آئی ایم ایف ) کے معاہدے کو سبوتاژ کرنے کی کوشش کی ۔
وزیر مملکت برائے پیٹرولیم کا کہنا تھا کہ پاکستان معاشی استحکام کی طرف بڑھ رہا ہے، ماضی میں بھی مسلم لیگ ( ن ) ملک کو بحرانوں سے نکالنے میں کامیاب ہوئی اور اب بھی ہم ہی ملک کو ان بحرانوں سے نجات دلائیں گے۔
مصدق ملک نے کہا کہ فی الحال اتحادی حکومت مختلف محاذوں پر لڑ رہی ہے اور حکومت کی توجہ عوام کو ریلیف دینے پر مرکوز ہے۔
انہوں نے مزید کہا کہ امید ہے کہ روس کے ساتھ کم قیمت پر تیل کے معاہدے کو مارچ کے آخر تک حتمی شکل دے دی جائے گی۔

اسلام آباد: (ویب ڈیسک) امریکی ریاست کیلیفورنیا کی ریاستی اسمبلی کے اراکین نے وزیر اعظم شہباز شریف سے ملاقات کی۔
وزیر اعظم سے ملنے والے 4 رکنی وفد کی قیادت کرس ہولڈن نے کی، وفد میں ایلوائس ریئس، مائیک گپسن اور وینڈی کیریلو شامل تھے، وزیر اعظم نے کیلیفورنیا کے اراکین اسمبلی کا پاکستان آمد پر خیرمقدم کیا۔
ملاقات کے دوران شہباز شریف نے کہا کہ پاکستان امریکہ سے دیرینہ تعلقات کو قدر کی نگاہ سے دیکھتا ہے، پاکستان امریکا کے ساتھ دوطرفہ تعلقات کو مزید گہرا کرنا چاہتا ہے، پاکستان اور امریکہ نے گزشتہ سال سفارتی تعلقات کی 75ویں سالگرہ منائی۔
وزیر اعظم نے کہا کہ کیلیفورنیا اور پنجاب کے درمیان سسٹر اسٹیٹ ریزولیوشن پر دستخط ایک خوش آئند پیش رفت ہے، وزیراعظم نے عوام سے عوام کے روابط کو مزید مضبوط بنانے میں پاکستانی نژاد امریکیوں کے مثبت کردار کو سراہا۔
مسٹر کرس ہولڈن نے وفد کی مہمان نوازی پر وزیراعظم شہباز شریف کا شکریہ ادا کیا، وفد نے پاکستان امریکہ تعلقات کو مزید وسعت دینے کی ضرورت پر زور دیا۔