اسلام آباد: (ویب ڈیسک) وزیر اعظم شہباز شریف کی زیر صدارت وفاقی کابینہ کا اجلاس ہوا جس میں بجلی کے طویل بریک ڈاؤن کی تفصیلی انکوائری رپورٹ پیش کی گئی۔
انکوائری رپورٹ میں 23 جنوری 2023 کو ہونے والے بریک ڈاؤن کی وجوہات کا ذمہ دار انسانی غفلت اور بجلی کی ترسیل کے نظام میں موجود خرابیوں کو قرار دیا گیا، رپورٹ 4 رکنی انکوائری کمیٹی نے مرتب کی، جس کی سربراہی وزیر مملکت پٹرولیم مصدق ملک کر رہے تھے۔
رپورٹ میں نہ صرف واقعہ کی بنیادی وجوہات بیان کی گئیں بلکہ ذمہ داران کی نشاندہی اور آئندہ ایسے واقعات سے بچنے کیلئے تجاویز بھی دی گئی ہیں، بجلی کا بریک ڈاؤن پاور پلانٹس کے ٹرپ ہونے کے بعد صرف 4 منٹ میں پورے ملک میں پھیلا جس کی بنیادی وجہ انسانی غفلت تھی۔
ملک کے شمال میں بجلی کی طلب کو پورا کرنے کیلئے جنوبی علاقے میں وِنڈ انرجی سے پیدا کی جانے والی بجلی سسٹم میں شامل کی گئی تو اے سی لائن کی فریکوئنسی غیر معمولی طور پر بڑھ گئی، جس میں یکدم اضافے سے مختلف پاور پلانٹس خودکار سکیورٹی سسٹم کے تحت ٹرِپ کر گئے۔
رپورٹ میں مزید کہا گیا کہ پاور پلانٹس کو بلک سٹارٹ سسٹم کے ذریعے ری سٹارٹ ہونا تھا لیکن اس نظام کی ناکامی کی وجہ سے کئی علاقوں میں بجلی کی بحالی میں تاخیر ہوئی، کوٹ ادو پاور کمپنی کے پاس بلک سٹارٹ کی سہولت موجود ہے لیکن اس پاور پلانٹ کے معاہدے کی معیاد ختم ہوچکی ہے۔
اجلاس کے شرکاء سے گفتگو کرتے ہوئے وزیر اعظم شہباز شریف نے کہا کہ قوم منتظر ہے کہ اس واقعے کے ذمہ داران کو اُن کی سنگین لاپرواہی پر قرار واقعی سزا دی جائے، پاور ڈویژن اس غفلت کے مرتکب اہلکاروں کے خلاف فوری محکمانہ کارروائی کرے، کیپکو کے پاور پرچیز کے معاہدے کی معیاد ختم ہو چکی تھی تو اس کی تجدید کیلئے ضروری کارروائی میں تاخیر کیوں کی گئی۔
وزیراعظم شہباز شریف نے مزید کہا کہ متعلقہ حکام بجلی کے نظام کو سپروائزری کنٹرول اینڈ ڈیٹا ایکوزیشن (ایس سی اے ڈی اے) سے منسلک کرنے کیلئے ضروری اقدامات اٹھائیں، پاور ڈویژن اور دیگر متعلقہ ادارے بھی بجلی کی پیداوار اور ترسیل کے نظام میں اصلاحات کے حوالے سے جامع لائحہ عمل مرتب کر کے کابینہ کی منظوری کیلئے پیش کریں۔
وفاقی کابینہ کو بجلی چوری اور لائن لاسز کے حوالے سے پاور ڈویژن نے تفصیلی بریفنگ بھی دی، اس موقع پر پاور ڈویژن کی جانب سے تجویز دی گئی کہ ایسے علاقے جہاں پر لائن لاسز 60 فیصد اور اُس سے زیادہ ہیں وہاں پر صورتحال کو قابو میں لانے کیلئے ایک خصوصی پولیس فورس تشکیل دی جائے۔
بریفنگ میں مزید بتایا گیا کہ ملک میں بجلی سے چلنے والے ٹیوب ویلز کی سولرائزیشن کا منصوبہ زیرِ غور ہے جس کا آغاز سب سے پہلے بلوچستان سے کیا جائے گا، وزیراعظم نے بجلی چوری، لائن لاسز کو ختم کرنے کے حوالے سے حکمت عملی اور بجلی سے چلنے والے ٹیوب ویلز کی سولرائزیشن کے حوالے سے کابینہ کمیٹی تشکیل دینے کی ہدایت کی۔

کراچی: (ویب ڈیسک) پیپلز پارٹی کراچی ڈویژن نے بھی شہر قائد میں ہونے والی مردم شماری پر شدید تحفظات کا اظہار کر دیا۔
پیپلز پارٹی کا اجلاس کراچی ڈویژن کے صدر سعید غنی کی زیر صدارت ہوا، اس موقع پر گفتگو کرتے ہوئے سعید غنی نے کہا کہ مردم شماری صاف اور شفاف انداز میں ہو تاکہ صوبے کی حقیقی آبادی سامنے آ جائے، آبادی ہی صوبے کے ترقیاتی کاموں کیلئے ضروری ہے، مردم شماری کے بعد ہی حلقہ بندیاں درست بن سکتی ہیں، این ایف سی میں صوبوں کا حصہ مردم شماری پر ہی منحصر ہے۔
صوبائی وزیر سعید غنی نے کہا کہ پیپلز پارٹی واحد سیاسی جماعت تھی جس نے 2018 کی مردم شماری پر بھرپور آواز بلند کی اور ای سی سی سمیت تمام پلیٹ فارمز پر اس حوالے سے آواز اٹھائی تھی، پیپلز پارٹی کراچی ڈویژن کے تحت مردم شماری کی شکایت کے اندراج کیلئے شکایتی سیل قائم کیا جائے گا۔
اس موقع پر گفتگو کرتے ہوئے وقار مہدی نے کہا کہ مردم شماری کے عام عوام اور صوبے کے فوائد کے حوالے سے ہمیں شعور اجاگر کرنے کی ضرورت ہے، گھر پر خواتین کو آگاہی کی فراہمی کیلئے پی ایس، یو سی اور وارڈز کی سطح پر کام کرنا ہوگا، صوبے کی آبادی کا درست تعین کروانا ہم سب کی ذمہ داری ہے۔

لاہور: (ویب ڈیسک) مسلم لیگ (ن) کی چیف آرگنائزر مریم نواز نے کہا ہے کہ ان لوگوں پر تنقید کرنے کے لیے آپ کا حوصلہ ہے۔
سماجی رابطے کی ویب سائٹ ٹوئٹر پر عمران خان کے ٹوئٹ کا جواب دیتے ہوئے مریم نواز نے کہا کہ بے رحمانہ لوٹ مار، نااہلی، غلط ترجیحات، ظالمانہ ڈیل جو آپ نے آئی ایم ایف کے ساتھ کی اور پھر اس کی خلاف ورزی نے ملک کو معاشی بدحالی میں ڈالا، ہم اس کو ختم کر رہے ہیں۔
مریم نواز نے اپنے ٹوئٹ میں مزید کہا آئیے اس تباہی کیلئے ان تمام لوگوں کا شکریہ ادا کرنا نہ بھولیں جنہوں نے آپ کو 4 سال تک چن لیا اور کھلایا، ساتھ ہی عدلیہ میں ان کے اثر و رسوخ کی باقیات کا بھی جن پر آپ اب انحصار کر رہے ہیں، ان شاء اللہ ہم ایسا نہیں ہونے دیں گے۔

عباس پور: (ویب ڈیسک) بلدیاتی انتخابات کا آخری مرحلہ مکمل ہو گیا جس میں پی ٹی آئی نے میدان مار لیا۔
ریٹرننگ آفیسر ابصار افتخار کی جانب سے چاروں یونین کونسلز سے کامیاب ہونے والے چئیرمین اور وائس چیئرمین کے غیر سرکاری نتائج کا اعلان کر دیا گیا، جس کے مطابق ٹاؤن کمیٹی عباسپور کے چئیرمین شیراز احمد چودھری اور آزاد امیدوار سردار محمد شبیر عرف لالہ کامیاب ہو گئے۔
یونین کونسل چھاترہ سے ملک اسد چیئرمین اور صوبیدار (ر) راجہ رفیق بھٹی وائس چیئرمین، یونین کونسل چفاڑ سے حاجی راجہ محمد رفیق کیانی چیئرمین، محمد امین چودھری وائس چیئرمین، یونین کونسل کھلی درمن سے سردار جنید کبیر احمد ایڈووکیٹ چیئرمین جبکہ راجہ ابراہیم خان وائس چیئرمین منتخب ہوئے۔
یونین کونسل ٹنگیڑاں سے سید نصیر حسین شاہ چیئرمین، محمد تیمور وائس چیئرمین، ٹاؤن کمیٹی عباسپور میں اپ سیٹ ہوا جہاں پی ٹی آئی کے ٹکٹ ہولڈر کو شکست ہوئی، پی ٹی آئی کے ہی دوسرے امیدوار چودھری شیراز پی پی پی اور آزاد ممبر سردار شبیر لالہ کے ساتھ ملکر چیئرمین منتخب ہوگئے۔

اسلام آباد: (ویب ڈیسک) سابق وفاقی وزیر حماد اظہر نے کہا ہے کہ پی ڈی ایم نے 11 ماہ میں سب کچھ کر کے دیکھ لیا، آپ کے سامنے ہاتھ جوڑ کر کہتے ہیں استعفیٰ دیں اور گھر جائیں۔
میڈیا سے گفتگو کرتے ہوئے حماد اظہر نے کہا کہ ایکسپورٹ تباہ ہو چکی ہے، موجودہ حکومت عوام کو ریلیف فراہم کرنے میں ناکام رہی، تحریک انصاف نے اپنے دور میں عوام کو ریلیف فراہم کیا، 5500 ارب روپے قرضوں پر سود ادا کرنا ہے، معیشت کی صورتحال انتہائی خطرناک ہے، ہم بار بار وارننگ دیتے رہے کہ ان سے معیشت نہیں سنبھل رہی، اس سے پہلے بھی یہ معیشت کو 2 مرتبہ تباہ کر چکے۔
سابق وفاقی وزیر حماد اظہر نے مزید کہا کہ اپنے ہی لوگوں کو غیر قانونی طور پر اٹھا کر ہراساں کیا گیا، آج الیکشن کمیشن پوری قوم کے سامنے مذاق بن گیا ہے، عدلیہ کے اندر تفریق پیدا کرنے کی کوشش کی جا رہی ہے، کل ہم نے ملک کے ساتھ مذاق دیکھا، وزیر قانون اور اٹارنی جنرل نے غیر ذمہ دارانہ گفتگو کی، ہم عالمی دنیا میں مذاق بن کر رہ گئے ہیں۔
انہوں نے کہا آج ملک دیوالیہ ہونے سے بھی آگے کھڑا ہے، پی ٹی آئی کو کچھ کہنے کی ضرورت نہیں سروے کروا کر دیکھ لیا جائے، اسحاق ڈار 4 ماہ آئی ایم ایف کو آنکھیں دیکھاتے رہے، کبھی کہتے ہیں قطر سے پیسے آنے ہیں، کہیں سے کوئی پیسے نہیں آئے، اس وقت ملک کو صاف شفاف مینڈیٹ کی ضرورت ہے، یہ گیمز کھیلنے اور ہراساں کرنے سے استحکام نہیں آئے گا۔
حماد اظہر نے مزید کہا کہ آج سارا ملک مایوس بیٹھا ہے، لوگوں کی مایوسی غصے میں تبدیل ہو رہی ہے، ابھی بھی ان کا خیال ہے ڈرانے دھمکانے سے کچھ ہو جائے گا، جو لوگ بیٹھے ہوئے ہیں وہ غیر سنجیدہ ہیں، سننے میں آ رہا ہے کہ الیکشن ہوئے تو آئی ایم ایف معاہدہ نہیں کریں گے، ملکی معیشت کو خطرے میں ڈال رہے ہیں اور کیسز عمران خان اور شوکت ترین پر بنا رہے ہیں۔
سابق وفاقی وزیر نے کہا کہ یہ ملک اپنا فیصلہ کر چکا ہے، عوام کو حکمران چننے کا موقع دیا جائے، یہ گیمز ہی ہمیں یہاں تک لے آئی ہیں، ہم وارننگ دیتے رہے ہیں کہ صورتحال یہاں تک آ جائے گی، اس ملک کو کس سمت لے جایا جا رہا ہے؟، صورتحال سنگین ہے، ہر پاکستانی آج پریشان ہے اور غصے میں ہے، ان کے پاس عوام کا اعتماد نہیں، انتخاب کا نام سن کو ان کو رات نیند نہیں آتی۔
انہوں نے مزید کہا کہ یہ اتفاق فاؤنڈری کا ترازو نہیں جو ایک جیسا وزن کرے گا، ہم اس ملک کو الیکشن کی طرف لے جانا چاہتے ہیں، ساری دنیا کو معلوم ہے پی ڈی ایم حکومت منتخب حکومت نہیں ہے، بیساکھیوں پر کھڑی ہے، اعظم نذیر تارڑ جیسے لوگوں کی بڑھکوں پر مت جائیں یہ تو کونسلر کا الیکشن نہیں جیت سکتے۔