لاہور : (ویب ڈیسک) لاہور ہائیکورٹ نے بیوہ کے حق میں اہم فیصلہ سنا دیا عدالت نے باپ اور خاوند کی پینشن کا بیوہ کوحق دارقرار دے دیا۔
عدالت نے بیوہ کو دوہری پینشن کی ادائیگی کا حکم دے دیا بیوہ کو سنگل پینشن کی ادائیگی کےحوالے سے محکمہ خزانہ پنجاب کا نوٹیفیکیشن کالعدم قرار دیا گیا۔
رضیہ سلطانہ نامی بیوہ کی درخواست میں سرکاری وکیل کا محکمہ خزانہ پنجاب کی جانب سے عدالت میں موقف پیش کیا گیا کہ لاہورسپریم کورٹ نےغیرشادی شدہ بیٹی کو سرکاری ملازم ماں باپ کی پینشن کا حقدار قرار دے رکھا ہے، اور لاہورسپریم کورٹ کے فیصلے کی روشنی میں باپ اور خاوند کی دوہری پینشن بیوہ کا حق ہے، لیکن خاتون اپنے باپ کی ایک پینشن وصول کررہی ہے۔
سرکاری وکیل نے کہا کہ ایک ذرائع آمدن ہونے کی بناء پر دوسری پینشن کی فراہمی نہیں ہوسکتی ، محکمہ خزانہ نے بیوہ کوسنگل پینشن کی ہی ادائیگی کا نوٹیفیکیشن کررکھا ہے۔
عدات نے کہا کہ سپریم کورٹ کےحکم کے بعد سگنل پینشن کی ادائیگی کےنوٹیفیکیشن کی کیا حیثیت ہے۔

لاہور: (ویب ڈیسک) حمزہ شہباز نے کہا ہے کہ کرپشن انڈیکس میں پاکستان 140 ویں نمبر پر آگیا، تحریک انصاف کی کرپشن اور لوٹ مار کی بدولت پاکستان دنیا بھر میں رسوا ہو گیا ہے۔
پاکستان مسلم لیگ ن کے نائب صدر اور پنجاب اسمبلی میں قائد حزب اختلاف حمزہ شہباز کا اپنے بیان میں کہنا تھا کہ ٹرانسپرنسی انٹرنیشنل کی تازہ رپورٹ اس حکومت کے خلاف چارج شیٹ ہے، ایک سال میں پاکستان کرپشن انڈیکس میں 16 درجے اوپر چلا گیا ہے، گذشتہ سال 124 نمبر والا ملک 140 ویں نمبر پر آ گیا ہے، کرپشن اور احتساب کا شور صرف اقتدار میں آکر مخالفین پر جھوٹے کیسز بنانے کا ذریعہ تھا۔
حمزہ شہباز نے مزید کہا کرپشن کا خاتمہ تو ن لیگ دور میں ہوا جب پاکستان کو 127 ویں درجے سے 117 نمبر پر لے آئے تھے لیکن پاکستان کی تاریخ میں کرپشن کا بازار کبھی اتنا گرم نہیں تھا۔

لاہور: (ویب ڈیسک) لاہور پریس کلب کے سامنے صحافی حسنین شاہ کے اندھے قتل کی سی سی ٹی وی فوٹیجز کی مدد سے تحقیقات جاری ہیں، پولیس نے 4 مشکوک افراد کو حراست میں لے لیا۔
لاہور پریس کلب کے سامنے سینئر صحافی حسنین شاہ کے قتل کا اندوہناک واقعہ، پولیس نے سی سی ٹی وی فوٹیجز کی مدد سے تحقیقات کا دائرہ وسیع کر دیا۔ فوٹیجز سے پتہ چلا ہے کہ شوٹرز حسنین شاہ کو قتل کرنے کے بعد برانڈرتھ روڈ تک گئے۔ مزید سی سی ٹی وی کیمروں سے ریکارڈ لینے کا سلسلہ جاری ہے جس کے بعد قاتلوں کے گرد گھیرا مزید تنگ کر دیا جائے گا۔
ترجمان پنجاب حکومت حسان خاور نے کہا ہے کہ صحافیوں کو ہراساں کرنے کی بالکل اجازت نہیں دیں گے، پولیس سمیت تمام ایجنسیاں لاہور پریس کلب کے باہر سینئر صحافی کے قتل کی تحقیقات کررہی ہیں۔

لاہور: (ویب ڈیسک) حسان خاور نے کہا ہے کہ جہاں چپڑاسی کے اکاؤنٹ سے اربوں نکلے وہاں کرپشن پر سیپشن کیا ہوگی، چور مچائے شور کی طرح سیاسی مخالف کرپشن پر ٹویٹ کر رہے ہیں۔
ترجمان پنجاب حکومت حسان خاور نے لاہور میں میڈیا سے گفتگو کرتے ہوئے کہا کہ وزیراعظم کی کارکردگی کو دنیا تسلیم کر رہی ہے، ملکی برآمدات میں ریکارڈ اضافہ ہوا، ہمارے دور میں ترسیلات زر میں ریکارڈ اضافہ ہوا۔ انہوں نے کہا کہ شریف خاندان کی سیاست سسیلین مافیا کی طرح ہے، شریف فیملی کی سسیلین مافیا کی کہانی پر سیریز بنانی چاہیے۔
حسان خاور کا کہنا تھا کہ شریفوں کے چپڑاسیوں کے اکاؤنٹس سے اربوں روپے برآمد ہوئے، جہاں سیاستدان پیسہ بیرون ملک بھیجیں وہاں کرپشن پر سیپشن کیا ہوگی۔

اسلام آباد: (ویب ڈیسک) مولانا فضل الرحمان کی سربراہی میں اپوزیشن جماعتوں کی آج بڑی بیٹھک ہوگی۔ پی ڈی ایم اجلاس میں لانگ مارچ اور ان ہاؤس تبدیلی سمیت اہم امور پر غور کیا جائے گا۔
مولانا فضل الرحمان کی سربراہی میں پی ڈی ایم سربراہی اجلاس آج ہوگا۔ جس میں سابق وزیر اعظم نواز شریف، مسلم لیگ (ن) کے صدر شہباز شریف ویڈیو لنک کے ذریعے شریک ہونگے۔ سربراہی اجلاس اسٹیرنگ کمیٹی کی سفارشات کی منظوری دے گا، جس میں وزیراعظم، اسپیکر، ڈپٹی اسپیکراور چیئرمین سینیٹ کیخلاف تحریک عدم اعتماد لانے، لانگ مارچ کی تیاری، خیبرپختونخوا میں بلدیاتی انتخابات کے دوسرے مرحلے پر غور شامل ہے۔
ذرائع کا کہنا ہے کہ اجلاس میں منی بجٹ، سٹیٹ بینک ترمیمی بل اور ای وی ایم مشین کے استعمال کا معاملہ بھی زیر بحث آئے گا جبکہ صدارتی نظام پر چھیڑی جانے والی بحث پر سفارشات تیار کرنے کا بھی فیصلہ کیا گیا۔ اسٹیئرنگ کمیٹی نے سفارش کی تھی کہ 23 مارچ کے لانگ مارچ کی تاریخ تبدیل نہیں ہونی چاہیے، فارن فنڈنگ کیس مضبوط کیس ہے، تحریک انصاف کے کئی اکاؤنٹ خفیہ ہیں اس کو اٹھایا جائے۔

لاہور: (ویب ڈیسک) لاہور کے علاقے ڈیفنس سی میں مبینہ پولیس مقابلے میں بچھو گینگ کا سرغنہ مدثر عرف بچھو ہلاک ہو گیا۔
ڈیفنس سی کے علاقے برکی میں پولیس پرڈاکوؤں کی جانب سے اندھا دھند فائرنگ کی گئی، ڈاکووں کا اپنا ساتھی فائر لگنے سے ہلاک ہو گیا۔ اس کے 3 ساتھی ملزمان دھند کا فائدہ اٹھاتے ہوئے پیدل فرار ہو گئے۔
ہلاک ہونے والا ملزم 55 سے زائد وارداتوں میں مطلوب تھا، مدثر عرف بچھو نے 2017 میں نشتر کے علاقے میں دوران مزاحمت کانسٹیبل محمد اعظم کو شہید بھی کیا تھا۔

لاہور: (ویب ڈیسک) لاہور ہائیکورٹ نے ریور راوی پروجیکٹ کو کالعدم قرار دے دیا۔ عدالت نے کہا کہ ریور راوی پروجیکٹ پر فوری کام روک دیا جائے۔
لاہور ہائیکورٹ نے اپنے فیصلے میں روڈا ایکٹ کی دفعہ 4 کو آئین سے متصادم قرار دے دیا۔ فیصلے میں مزید کہا گیا کہ منصوبے کا ماسٹر پلان مقامی حکومت کے تعاون کے بغیر بنایا گیا، زرعی اراضی قانونی طور پر ہی ایکوائر کی جاسکتی ہے، روڈا ایکٹ کی دفعہ 4 کا نوٹیفکیشن غیر قانونی ہے، منصوبے کیلئے 5 بلین قرضہ فوری واپس کیا جائے۔

اسلام آباد: (ویب ڈیسک) شیری رحمان نے کہا ہے کہ ٹرانسپرنسی انٹرنیشنل کی پرسیپشن انڈیکس حکومت کے خلاف چارج شیٹ ہے، پاکستان کا کرپشن میں 16 درجے اوپر جانا حکومت کے بیانیے کو بے نقاب کرتا ہے۔
پاکستان پیپلزپارٹی کی نائب صدر و سینیٹر شیری رحمان نے سماجی رابطے کی ویب سائٹ پر ٹویٹ کرتے ہوئے کہا کہ 2020 میں دنیا بھر میں پاکستان کرپشن پرسیپشن انڈیکس میں 124 نمبر پر تھا، ایک سال کے اندر پاکستان 140 ویں نمبر پر آگیا، ‏کرپشن ختم کرنے کی دعویدار حکومت نے 16 ممالک کو کرپشن میں پیچھے چھوڑ دیا ہے۔
شیری رحمان کا کہنا تھا کہ دوسری طرف مشیر احتساب کا استعفی اس بات کا ثبوت ہے کہ کرپشن کم نہیں، بڑھی ہے، احتساب صرف مخالفین کو نشانا بنانے کے لئے ہے، اس حکومت کی کرپشن سے اب عالمی ادارے پردہ اٹھا رہے ہیں۔