اسلام آباد: (ویب ڈیسک) ٹرانسپرنسی انٹرنیشنل نے 180 ممالک کا کرپشن پر سیپشن انڈیکس جاری کر دیا۔ جس کے مطابق پاکستان میں کرپشن مزید بڑھ گئی۔
ٹرانسپرنسی انٹرنیشنل رپورٹ کے مطابق پاکستان کرپشن رینکنگ میں 16 درجے اوپر چلا گیا، کرپشن پر سیپشن انڈیکس میں پاکستان دنیا میں 140 ویں نمبر پر آگیا، 2020 میں پاکستان کا نمبر دنیا میں 124 واں تھا، 2020 میں کرپشن پر سیپشن انڈیکس میں پاکستان کا اسکور 31 تھا، 2021 میں کرپشن پر سیپشن انڈیکس میں پاکستان کا اسکور 28 ہوگیا۔ کرپشن پر سیپشن انڈیکس میں اسکور کم ہونا کرپشن میں اضافے کو ظاہر کرتا ہے۔

اسلام آباد: (ویب ڈیسک) شاہد خاقان عباسی نے کہا ہے کہ شہزاد اکبر بتا دیں انہیں عمران خان نے نکالا ہے یا استعفیٰ دیا ؟ ساڑھے 3 سال بعد پتہ چلا بچہ نالائق تھا، اسے نکال دیا، شہزاد اکبر اپنی ساڑھے 3 سال کی کارکردگی سے آگاہ کریں۔
سابق وزیراعظم اور ن لیگ کے رہنما شاہد خاقان عباسی نے اسلام آباد میں میڈیا سے گفتگو کرتے ہوئے کہا کہ کوئی کہتا ہے وزیراعظم نے شہزاد اکبر کو چارج شیٹ کر دیا، شہزاد اکبر بڑا کہا کرتے تھے ثبوتوں کے بکسے بھرے ہیں، کبھی لندن جا رہے ہیں، کبھی آ رہے ہیں، ایک فوج ہے جس کا کام صرف پریس کانفرنسز کرنا ہے، کونسی وزارت ہے جس میں سیکڑوں اربوں کا اسکینڈل نہیں ہے۔
شاہد خاقان عباسی کا کہنا تھا کہ وزیراعظم اتوار کے روز جلوہ فروز ہوئے اور کہا میں سڑکوں پر نکل آیا تو آپ کو چھپنے کی جگہ نہیں ملے گی، عوام تو پہلے ہی گھبرائے ہوئے تھے، اب وزیراعظم کی دھمکیوں سے اور گھبرا گئے، جوسرکس لگی ہوئی ہے، ملک مزید اسے برداشت نہیں کرسکتا، ملک کے سارے چور کابینہ کی میز پر بیٹھے ہیں، آج کرپشن کے انڈیکس میں پاکستان 140 ویں نمبر پر آگیا۔ انہوں نے کہا کہ آج پی ڈی ایم کا سربراہی اجلاس ہے، جس میں سفارشات پیش کی جائیں گی، 23 مارچ کو لانگ مارچ ہوگا۔

اسلام آباد: (ویب ڈیسک) اسلام آباد ائیرپورٹ پر حکام نے مسافر سے 6 کلو سے زائد ہیروئن برآمد کرکے گرفتار کر لیا۔
اسلام آباد ائیرپورٹ پر ہیروئن سمگل کرنے کی کوشش ناکام بنا دی گئی، مالاکنڈ کا میر سجاد نامی رہائشی ائیرپورٹ پہنچا تو ائیرپورٹ سکیورٹی فورس کے اہلکاروں نے مشکوک حرکات پر سامان کی تلاشی لی جس میں سے 6 کلو سے زائد ہیروئن برآمد ہوئی، ملزم منشیات سعودی عرب لے جانا چاہتاتھا۔
اے ایس ایف حکام نے ملزم کو گرفتار کر کے انٹی نارکوٹکس فورس کے حوالے کر دیا۔

لاہور: (ویب ڈیسک) وزیراعلیٰ عثمان بزدار نے کہا ہے کہ بدتہذیبی مسلم لیگ ن کا وتیرہ ہے، یہ چور مچائے شور والا راگ الاپ رہے ہیں، مریم اورنگزیب کے عمران خان کے بارے میں غیر شائستہ الفاظ قابل مذمت ہیں، ترجمان ن لیگ اپنے بیان پر قوم سے معافی مانگیں۔
وزیراعلیٰ پنجاب عثمان بزدار نے اپنے بیان میں کہا ہے کہ مسلم لیگ ن کے رہنما ماضی میں سابق وزیراعظم بے نظیر بھٹو کے خلاف بھی غیر شائستہ الفاظ استعمال کرتے رہے، مریم اورنگزیب نے اخلاقی پستی کا مظاہرہ کر کے ہر پاکستانی کی دل آزاری کی ہے، انہوں نے ثابت کیا ہے کہ مسلم لیگ ن میں اخلاقی، سیاسی و جمہوری اقدار کا کوئی وجود نہیں۔
عثمان بزدار کا کہنا تھا کہ نازیبا الفاظ پر انہیں قوم سے معافی مانگنی چاہیے، کوئی بھی شائستہ یا باوقار شخص ایسے الفاظ کا چناؤ نہیں کر سکتا، مسلم لیگ ن اس وقت چور مچائے شور والا راگ الاپ رہی ہے، وزیر اعظم عمران خان کروڑوں پاکستانیوں کے لیڈر ہیں، پاکستانی عوام وزیراعظم عمران خان سے دلی محبت رکھتے ہیں۔

لاہور: (ویب ڈیسک) پنجاب اور خیبرپختونخوا کے مختلف علاقوں میں سردی بڑھنے سے دھند میں اضافہ ہوگیا۔ حد نگاہ کم ہونے سے موٹروے کئی مقامات سے ٹریفک کیلئے بند کر دی گئی، دھند کے باعث فلائٹس کا شیڈول بھی متاثر ہوا۔
ملک کے بیشتر علاقوں میں شدید سردی کا راج ہے۔ درجہ حرارت کم ہونے پر دھند کے بادل چھا گئے، ہر منظردھندلاگیا۔ کئی علاقوں میں شدید دھند سے معمولات زندگی متاثر ہوئے، سڑکوں پر حد نگاہ انتہائی کم ہونے سے شہریوں کو آمدورفت میں پریشانی کا سامنا کرنا پڑا، موٹروے پولیس نے شہریوں کو دھند میں بغیر ضرورت سفر سے گریز کی ہدایت کر دی۔
دھند کے باعث فلائٹس کا شیڈول بھی متاثر ہوا، پروازوں کا شیڈول تبدیل ہونے سے مسافروں کو مشکلا ت کا سامنا ہے۔ موسم کا حال بتانے والوں کے مطابق آج کشمیر میں بعض مقامات پر ہلکی بارش اور پہاڑوں پر برفباری کا امکان ہے۔ مری اور گلیات میں بھی بارش اور برفباری کی پیشگوئی ہے۔