بالی وڈ میں رومانس کے لیے مشہور اداکار عمران ہاشمی نے ماضی میں ایشوریا رائے کو ‘پلاسٹک’ بولنے پر افسوس کا اظہار کیا ہے۔
عمران ہاشمی نے ایک بار کرن جوہر کے ٹاک شو ‘کافی ود کرن’ کے چوتھے سیزن میں ریپڈ فائر راؤنڈ کے دوران ایشوریہ رائے بچن کو ‘پلاسٹک’ کہا تھا۔
2014 میں کیے گئے کے تبصرے کے بعد اداکار کو شدید ردعمل کا سامنا کرنا پڑا تھا۔
حال ہی میں للن ٹوپ کو ایک انٹرویو دیتے ہوئے انہوں نے ایشوریا کے بارے میں اپنے متنازعہ تبصرے کا ذکر کرتے ہوئے کہا کہ ‘اگر انہیں برا لگا ہو تو میں معافی مانگنا پسند کروں گا۔’
انٹرویو کے دوران عمران ہاشمی سے پوچھا گیا کہ کیا انہیں ایشوریہ رائے بچن کو ‘پلاسٹک’ کہنے پر افسوس ہے، جس پر انہوں نے فوراً جواب دیا کہ ‘ہاں مجھے اس کا افسوس ہے، میں یہ کہتا رہتا ہوں کہ میں ہر اس شخص کا احترام کرتا ہوں جس کے بارے میں، میں نے بات کی’۔
مزید وضاحت کرتے ہوئے انہوں نے اعتراف کیا کہ ‘مجھے اس پر افسوس ہے کیونکہ یہ ناگوار تھا، اب لوگ بہت حساس ہو گئے ہیں، لوگ سوشل میڈیا پر ہر چھوٹی چھوٹی چیز پر پاگل ہوجاتے ہیں’۔
ان کا کہنا تھا کہ شو کے لحاظ سے ہم ایک کھیل کھیل رہے تھے، یہ سب مذاق میں تھا۔ اسے مذاق میں ہی لیا جانا چاہیے تھا، شو میں ایسے بہت سے گیمز ہوتے ہیں، پہلے لوگ اتنے حساس نہیں تھے’۔
عمران ہاشمی نے مزید کہا کہ ‘حال ہی میں کرن جوہر نے خود یہ اعتراف کیا کہ شو کے تازہ ترین سیزن میں ریپڈ فائر راؤنڈ سب سے بورنگ تھا اس کی وجہ یہ ہے کہ اب ماحول مکمل طور پر بدل چکا ہے’۔
اداکار نے کہا کہ ‘آپ اب ایسے جواب نہیں دے سکتے، اس وقت میں صرف ہیمپر جیتنا چاہتا تھا اور میں نے اس کے لیے وہ الفاظ ادا کردیے’۔
واضح رہے کہ ایشوریا رائے نے کبھی بھی براہ راست اس تبصرے پر کوئی رد عمل ظاہر نہیں کیا البتہ 2019 میں فلم فیئر کو ایک انٹرویو دیتے ہوئے اداکارہ نے کہا کہ ان کے بارے میں اب تک کی گئی سب سے بری بات یہ ہے کہ انہیں ‘جعلی اور پلاسٹک’ کہا گیا۔
عمران ہاشمی سے جب پوچھا گیا کہ کیا وہ کبھی ایشوریہ رائے بچن سے ملے ہیں؟ تو انہوں نے کہا کہ میں ان سے کبھی نہیں ملا نہ ہی کبھی بات کی، البتہ میں ان سے ملنا پسند کروں گا۔ اور اگر انہیں میری بات کا برا لگا تو میں معافی مانگنا پسند کروں گا۔
