لاہور(کلچرل رپورٹر)ایم ڈی پروڈکشنز اور سینٹر فار کمیونیکیشنز پروگرامزپاکستان کے اشتراک سے بننے والی سیریل ”سمّی“کی پہلی قسط گزشتہ روزآن ایئر ہوگئی ہے جسے شائقین نے بہت پسندکیا ہے۔ اس سیریل کی کہانی معروف لکھاری نور الہدی شاہ کی تحریر ہے جو قبل ازیں ماروی ‘ جنگل اور عجائب گھر جیسے شاہکار تخلیق کرچکی ہیںجبکہ ڈرامے کی ہدایت کاری سیفی حسن نے کی ہے ۔ سیریل کے نمایاں اداکاروں میں عدنان صدیقی‘ عرفان کھوسٹ‘ نور الحسن ‘ سیمی راحیل‘ ثمن انصاری‘ مدیحہ رضوی‘ نادیہ افگن ‘ثانیہ سعید اور ریحان شیخ شامل ہیں جبکہ اداکارہ ماوراحسین ”سمّی“ کے ذریعے طویل عرصے کے بعد چھوٹی اسکرین پر جلوہ گر ہورہی ہیں۔اس سیریل کے ذریعے گلوکار بلال خان اور احد رضا میرپہلی مرتبہ عو ام کے سامنے آئیں گے۔”سمّی“کئی معاشرتی مسائل کا پردہ چاک کرے گی جس میں ونی جیسی قبیح رسم کے ساتھ ساتھ زچہ و بچہ کی صحت اور خواتین کے وراثتی حق کے قانون شامل ہیں۔”سمّی“ خواتین کے ایسے کرداروں کی کہانی ہے جو روایتی اور معاشرتی حدود کو توڑ کر اپنے اوپر ہونے والے مظالم کے خلاف آواز بلند کرنے کا حوصلہ پیدا کرتی ہیں۔
